Еве што, според психолозите, може да го подигне вашиот основен степен на среќа:

1. Престанете со активности што ви го одземаат времето

За луѓе со многу ниски приходи, значително зголемување на богатството може да донесе и повисоко ниво на благосостојба, бидејќи создава стабилност и предвидливост, објаснува психологот Лара Акнин.

„Но, кога луѓето веќе се наоѓаат во удобна животна позиција, податоците покажуваат дека повеќе пари не носат многу дополнителна среќа“, додава таа.

Всушност, насочувањето на слободното време кон дополнителна заработка може да има контраефект.

„Социјалните односи се најголем предвидувач на среќа. Ако ги жртвувате викендите за работа, наместо да поминувате време со семејството и пријателите, веројатно ќе бидете помалку среќни“, предупредува Акнин.

2. Одберете разновидност наместо рутина

Истражувачите кои ја проучуваат врската помеѓу физичката активност и среќата сметаат дека треба да создадеме тренинг-рутина со различни видови движење – еден ден бокс, следниот фудбал, а за викенд качување по карпи или пилатес.

„Доследноста и рутината се важни, но разновидноста создава простор за свежина и ентузијазам. Таа го спречува ефектот на адаптација – кога телото и умот се навикнуваат и досадуваат“, вели Акнин.

3. Испробувајте нови работи – само за забава

Тестирањето нови активности ја зголемува среќата.

„Постои огромна предност во нурнувањето во ново хоби што сè уште не сме го совладале – мислите ни се целосно насочени кон сегашниот момент“, вели Мајкл Ракер, автор на книгата „The Fun Habit: How the Pursuit of Joy and Wonder Can Change Your Life“.

Тој препорачува активно да бараме „микро-радости“ – мали хобија и интереси што ни носат моментално задоволство, без притисок да постигнеме нешто големо.

4. Поставете нови, смислени цели

Психологот Кристијан Ерлих смета дека поставувањето цели не е лошо, но често се оддалечуваме од суштината.

Тој препорачува да ги запишете целите и да се запрашате:

Колку од нив ги следам за вистинско задоволство, а колку само за признание од околината?

„Среќата не произлегува од самото достигнување на целта, туку од процесот“, вели Ерлих. „Фокусирајте се на внатрешната мотивација – она што ве исполнува, а не на надворешните награди.“

5. Следете го трендот на „deinfluencing“

Постојаното споредување со другите и купување непотребни работи носи само краткотрајна среќа.

Забавете, оддалечете се од социјалните мрежи и поминете време во природа.

Размислете дали купувањето и слепото следење трендови навистина ви носи радост.

Поминувајте повеќе време со луѓето што ги сакате и во активности што ве исполнуваат – читање, музика, филмови, прошетки.

6. Запознавајте нови луѓе

Кратките разговори со непознати докажано го зголемуваат чувството на среќа.

Ако не ви е пријатно да започнувате разговори, приклучете се на локална група или клуб – новите познанства носат свежа енергија и позитивни искуства, пишува „Science Focus“.

Суштината, според психолозите, е едноставна:

Времето, вниманието и вистинските односи се највредните ресурси што ги имаме.

Кога ги вложуваме таму каде што навистина ни значи – среќата не е случајност, туку навика.