Меси индиректно му одговори на Роналдо: „Освојувањето на Светското првенство е самиот врв, нема ништо повеќе од тоа“
Доста полемики предизвика интервјуто на Пирс Морган со Кристијано Роналдо, во кое славниот Португалец изјави дека освојувањето на Светското првенство не го загрижува многу и дека тој трофеј нема да ја дефинира неговата кариера.
„Ако ме прашате, Кристијано, дали е сон да се освои Светско првенство? Не, тоа не е сон. Дали еден освоен турнир, од шест или седум натпревари, може да дефинира дали сум еден од најдобрите во историјата? Мислите ли дека тоа е фер?“, рече Роналдо.
За разлика од него, „вечниот ривал“, Аргентинецот Лионел Меси, смета дека освојувањето на Светското првенство е врвно признание во неговата неверојатна кариера.
За потсетување, Меси со Аргентина во 2022 година во Катар го освои Мундијалот, а на „America Business Forum“ изјави дека секој играч треба да се стреми кон освојување на Светското првенство.
„Вистина е дека тешко е да се опишат чувствата во тој момент. Тешко е со зборови да се објасни што значеше тој трофеј – за мене лично, за моето семејство, за соиграчите и за земјата. Беше јасно колку земјата славеше, каква потреба и желба имавме тоа повторно да се случи по толку време“, рече Меси и додаде:
„За еден играч, освојувањето на Светското првенство е ултимативно достигнување. Тоа е како секој професионалец во својот бизнис да го достигне самиот врв. По Светското првенство нема ништо повеќе. Не можете да барате ништо повеќе. И покрај тоа, имав среќа претходно да ги остварам сите други цели. Тоа беше делот што недостигаше. Беше како да ја затворам целата своја кариера со тој трофеј“.
