Од милионер до затвореник: Стигна казната за човекот којшто го „сруши“ крипто-пазарот

Американскиот окружен судија Пол Енгелмаер ја изрече казната во Менхетен, додека пак обвинителите бараа најмалку 12 години затвор, велејќи дека падот на криптовалутата Тerra предизвикал загуби од милијарди долари и домино ефект во кризата на пазарот на дигитални токени.

Адвокатите на Квон побараа максимум пет години затвор, за тој да може да се врати во Јужна Кореја и да се соочи со локални кривични обвиненија.

Квон беше обвинет за девет кривични дела, вклучувајќи измама со хартии од вредност, измама со банкарски трансакции, измама со стоки и заговор за перење пари.

Квон ги создаде криптовалутите TerraUSD и Luna, кои изгубија околу 40 милијарди долари во вредност во 2022 година, а претходно се изјасни за виновен, признавајќи дека ги довел во заблуда инвеститорите во врска со стабилноста на една од неговите валути за време на периоди на несигурност на пазарот.

Во обвинението се тврди дека Квон ги довел во заблуда инвеститорите во 2021 година во врска со TerraUSD, т.н. стабилна монета, која требало да одржува вредност од еден долар.

Кога вредноста на монетата паднала под тоа ниво, Квон тврдел дека алгоритмот „Теrra Protocol“ ја вратил цената, но всушност тој ангажирал фирма за тргување со висока фреквенција за тајно да купи милиони долари во токени и вештачки да ја одржи нејзината вредност.

Како дел од спогодбата со Комисијата за хартии од вредност на САД, Квон се согласил да плати 80 милиони долари во 2024 година и да му биде забрането да извршува крипто-трансакции, како дел од вкупната спогодба од 4,55 милијарди долари.

Тој се соочува и со обвиненија во Јужна Кореја, а обвинителите нема да го оспорат неговото потенцијално барање да биде префрлен во странство откако ќе отслужи половина од казната во САД.