Леден дожд, стопен па повторно замрзнат снег – и едното и другото може да предизвика наталожување вода меѓу гумените дихтунзи на вратите или во бравата, каде што потоа замрзнува.

Дополнителна причина се и екстремно ниските температури.

Што да направите кога вратите на автомобилот повеќе не се отвораат?

Најпрво проверете дали гумените дихтунзи на вратите се замрзнати и залепени или пак е замрзната бравата – оваа втора опција, секако, не претставува проблем кај автомобилите со централно заклучување, пишува „Ravijahak“.

Ако клучот влегува во бравата и може да се заврти, но вратата не се отвора, причината најчесто е замрзнатиот гумен раб на вратата. Во таков случај никогаш не обидувајте се на сила да ги отворите замрзнатите врати.

Доколку гумените дихтунзи на вратите и каросеријата се залепени, материјалот може да пукне и да дојде до посериозни оштетувања. Наместо силно да ја влечете вратата, прво притиснете ја однадвор.

Со малку умешност, мразот може да пукне меѓу дихтунзите. Може и нежно да потчукнете по лимениот дел од вратата. Пробајте и со другите врати – можеби совозачката страна полесно ќе се отвори.

Друга можност е да загреете вода на околу 50 степени, а потоа внимателно да ја полеете рамката на вратата. Но никогаш не користете врела вода, бидејќи може да ја оштети бојата.

Исто така, не полевајте го стаклото: наглото зголемување на температурата може да предизвика пукање. Откако вратата повторно ќе може да се отвори, исушете ја внатрешноста на вратата и гумените дихтунзи за да спречите нивно повторно замрзнување.

Ако бравата е замрзната, најпрво пробајте со хемиско средство за одмрзнување. Како алтернатива може да послужи и средство за дезинфекција кое содржи алкохол.

Може да помогне и запалка, со која ќе го загреете клучот од автомобилот. Потоа внимателно и полека вметнете го топлиот клуч во бравата и завртете го – на тој начин мразот во бравата може да се стопи.

Одмрзнување со фен? Не е добра идеја!

Не размислувајте за одмрзнување на вратите или бравата со фен за коса. За жал, тоа најчесто не помага.

На студен воздух, топлиот воздух од фенот толку брзо се лади што воопшто не допира до замрзнатите делови во гумените дихтунзи. Освен тоа, високите температури можат да го оштетат лакот на вратите.

Пред првите мразови, исчистете ги гумените дихтунзи на вратите со соодветно средство за одржување и нега на гумените делови на автомобилот.

Тенок заштитен слој спречува директен контакт на дихтунзите со другите делови од вратата и со тоа обезбедува гумата да не замрзнува. Воедно ги штити гумените дихтунзи од сушење и пукање.

Бравата на вратата може да се заштити со графит, а помага и редовното подмачкување, пишува германскиот авто-клуб „ADAC“.