Париз, Лондон, Тоскана, Венеција … Едноставно постојат места чија убавина е светски позната и кои навистина сите сакаат да ги видат. Затоа сè повеќе дестинации имаат проблеми со квалитетот на животот на локалното население и со инфраструктурата, па дури спроведуваат и „антитуристички“ кампањи, како Амстердам.

Но постои место каде што нема да доживеете ништо од наведеното. Најмалку посетуваната европска земја, Молдавија, годишно угостува само 11.500 туристи! Сепак, таа крие бројни знаменитости и занимливости, а туристите полека ја откриваат нејзината недоволно позната убавина.

Независна е од 1991 година, но во градовите сè уште преовладува социјалистичката архитектура

Молдавија се наоѓа во југоисточна Европа и се граничи со Украина на исток и со Романија на запад. Иако бреговите на Црното Море не ѝ се далеку, таа нема излез на него, туку е континентална земја. Тоа веројатно е е една од причините зошто никогаш не успеала да развие позначаен туризам. Се простира на 33.843 квадратни километри и има 2,5 милиони жители. Таа е поранешна советска држава, која независноста ја стекнала во 1991 година, па во тој контекст треба да се гледаат нејзиниот развој, транзицијата, но и архитектурата што ќе ве пречека во нејзините градови.

Главниот град Кишињев е полн со монументални социјалистички градби и споменици. Иако од осамостојувањето поминале повеќе од 30 години, некои делови од градот делуваат како патување неколку децении наназад во минатото. Но Кишињев е и една од најзелените метрополи, која ќе ве воодушеви со опуштената атмосфера и со пространи паркови.

Молдавија е речиси рамна – највисоката точка се наоѓа на висина од само 429 метри

Молдавија е изразито рамна земја, речиси без планини и ридови. Нејзиниот највисок врв, Баланештри (Bălaneştri), се наоѓа на само 429 метри надморска височина. Но тоа никако не значи дека природата е здодевна. Молдавија е богата со реки, езера и шуми. Зимите се кратки и благи, а летата долги и топли.

Сето ова придонело кон развојот на нивниот најпрепознатлив бренд: молдавските вина. Винарството на подрачјето на оваа земја има долга традиција – првата лоза била засадена дури 5000 години пред Христа. До 2006 година Молдавија била меѓу десетте најголеми извозници на вино во светот, а 80 отсто од сите шишиња ги извезувала во Русија. По руското ембарго, производството се намалило, но и понатаму е во топ 20 светски извозници.

Вината се гордоста на Молдавија, а таму се наоѓа и најголемиот вински подрум во светот

Молдавија денес има 148.500 хектари засадени лозја, кои покриваат 3,8 отсто од нејзината територија и седум отсто од сите обработливи површини. На 2,5 милиони жители има дури 331 винарија. Одгледуваат околу 50 сорти, меѓу кои се издвојуваат нивните автохтони сорти „Rară Neagră“, „Fetească regală“ и други. 

Во регионот Јаловени се наоѓа најголемиот вински подрум во светот, запишан во Гинисовата книга на рекорди. „Mileștii Mici“ чува околу 2 милиони шишиња, а подрумите имаат вкупна должина од околу 200 километри. Од тоа, денес во употреба се околу 55 километри.

Селото Валени е прогласено за едно од најубавите во Европа

Освен виното и архитектонски интересните градови, Молдавија има и други знаменитости што ги забавуваат туристите. Таа е преполна со културно и историско наследство, импресивни манастири и цркви, тврдини и палати. Селото Валени, сместено на езерото Белеу на југозападот од земјата, воодушевува со својата убавина, а лани било вброено меѓу најубавите европски села според изборот на Светската туристичка организација. Тие предвидуваат дека природниот резерват и јатата пеликани на езерото нема долго да останат „под радарот“ на светските туристи.

Молдавија е најсиромашната и најевтината европска држава

Ако ве заинтересирала оваа не толку популарна земја, ќе ве израдува фактот дека таа е и една од најевтините европски држави. Пивото чини 1,3 евра, сместување може да се најде веќе за 15 евра, а сметката во ресторан тешко дека ќе ја платите повеќе од 10 евра.

Службениот јазик во Молдавија е романски, а валутата е леј. Еден леј вреди само 0,05 евра. И покрај слабата економска развиеност и донеодамнешната зависност од Русија, Молдавија пред две години добила статус кандидат за членство во Европската Унија, а лани биле отворени преговорите. Влезот во ЕУ би можел да значи исчекор во развојот на земјата, која денес е една од најсиромашните во Европа.