Дефанзивецот на Реал Мадрид, Антонио Ридигер, ја искористил паузата поради празниците во Шпанија за да им помогне на другите.
Имено, како што објавил на социјалните мрежи, дел од својот одмор го поминал во Сиера Леоне, земјата од која потекнува неговата мајка, за да ја посети хуманитарната фондација што ја основал со цел да им помогне на оние на кои им е потребна поддршка во таа земја.
Ридигер организирал заеднички оброк за повеќе од 200 луѓе, меѓу кои слепи, глуви и лица со физичка попреченост. Освен што поделил храна и основни намирници, одвоил време и да се дружи со нив. Се сретнал и со спортисти со попреченост. Во округот Коно на истокот од Сиера Леоне, Ридигер го префрлил фокусот на развојот на младите преку фудбал. Во партнерство со еден спортски производител, поддржал повеќе од 350 млади фудбалери со комплетна спортска опрема и им се придружил на теренот на тренинзите.
Неговиот хуманитарен ангажман отишол и чекор понатаму: се сретнал со уште стотина деца, најмногу девојчиња, и се обврзал на долгорочна поддршка за нивното образование и исхрана. Донирани биле и медицински потрепштини на локалната јавна болница, со што биле покриени итните здравствени потреби. Ридигер и претходно им помогнал на болните деца во Сиера Леоне. Пред четири години финансирал операции за 11 деца кои имале проблем поради кој не можеле да одат без патерици.
