На брегот на Јадранското Море во Црна Гора неодамна беше пронајден бизарен, но и длабоко вознемирувачки потсетник за тоа како човечката негрижа остава трајни лузни на природата. Како што објави популарниот сајт „Подгорички времеплов“, од морето излегла пластична амбалажа стара повеќе од четири децении.

На фотографијата објавена на Инстаграм јасно се гледа пластична чаша со зелено-жолт натпис која ги издржала сите морски струи, сонце и временски услови. „Амбалажа со јогурт на Мљекаре Титоград, стара над 40 години. Времето минува, пластиката останува. Природата памети сѐ што оставаме зад себе“, пишува во објавата која брзо стана вирална и предизвика лавина од коментари.

Од длабочините на морето до човечките бели дробови

Пластиката, поради ниската цена и неверојатната издржливост, стана еден од најчестите материјали во светот. Сепак, нејзината „бесмртност“ е и нејзиното најголемо проклетство. Додека тони отпад секојдневно се фрлаат во околината, научниците сè почесто предупредуваат за опасноста од микропластиката.

Овие ситни честички, често невидливи за окото, кои не се биоразградливи, навлегоа во секоја пора на животот. Неодамна, микропластиката е пронајдена дури и во човечката крв и длабоко во белите дробови, а долгорочното влијание на овој тип на загадување врз здравјето на луѓето сѐ уште е голема и недоволно истражена непозната.

Апел на еколошки здруженија

Под објавата за „вечната чаша јогурт“ се огласи и организацијата „Зелени талас“ која спроведува програми за одржливо управување со отпад во Подгорица. Нивната порака е јасна: без промена на свеста на поединецот, системот не може да функционира.

„Отпадот нема место во природата, бидејќи пластиката и другите материјали остануваат со децении и предизвикуваат штета на екосистемите, животните и на крајот на луѓето“, велат од „Green Wave“.

Тие ги повикаа граѓаните да го фрлаат отпадот на одредени места и рециклажни дворови, нагласувајќи дека континуирано се залагаат системот да се поедностави, но дека клучот е во активното учество на секој граѓанин.