Маж за кој се тврди дека е роден кон крајот на 19 век, во 1884 година, починал во Саудиска Арабија. Наводно живеел три века.
Саудиските и другите арапски медиуми објавуваат дека Насер бин Радан Ал Рашид Ал Вадаеи, кој наводно имал 142 години во времето на смртта, починал во Ријад на 8 јануари (други извори тврдат 11 јануари).
Според саудиските медиуми, неговото семејство тврдело дека е роден кон крајот на 19 век, во 1884 година, во областа Дахран Ал Џануб, долго пред создавањето на модерна Саудиска Арабија (1932).
Така, наводно, тој надживеал неколку саудиски монарси и историски периоди, од основачот на државата, кралот Абдулазиз (познат на Запад како Ибн Сауд) до сегашниот крал Салман.
Тој бил познат меѓу локалното население по својата посветеност на религиозниот и општествениот живот. Според медиумските извештаи, тој го извршил муслиманскиот аџилак, хаџот, повеќе од 40 пати, поради што бил многу почитувана личност, а исто така стекнал репутација во заедницата поради неговата улога како посредник во помирувањата.
Неговото семејство им кажало на новинарите дека тој бил во добра физичка и ментална состојба до самиот крај и останал социјално активен.
Извештаите исто така наведуваат дека за последен пат се оженил на 110-годишна возраст и дека подоцна добил ќерка. Се вели дека имал најмалку 134 деца и внуци.
На неговата погребна молитва наводно присуствувале повеќе од 7.000 ужалени, а бил погребан во неговото родно село Ал Рашид.
Горната граница на животниот век на човекот, според науката е веројатно околу 120 или 125 години, иако за ова не постои целосен консензус.
Исто така, имало извештаи за луѓе кои наводно живееле над 140 или дури 150 години, но досега за ниту еден таков случај немало понудени докази, бидејќи не постоеле проверливи записи за нивните датуми на раѓање.
Досега докажано најдолговечната личност била Французинката Жан Калмент, која починала во 1997 година на возраст од 122 години и 164 дена.
Моментално официјално најстарата жива личност е Англичанката Етел Катерам, родена на 21 август 1909 година, која има нешто повеќе од 116 години.
Нешто повеќе од три години помлад е најстариот жив маж на светот, Бразилецот Жоао Марињо Нето, роден на 5 октомври 1912 година, кој има повеќе од 113 години.
