Три европски земји што ги издвоил

Гостувајќи пред неколку недели во поткастот „The Checkup with Doctor Mike“, д-р Емануел одговорил на хипотетичко прашање од водителот: ако денес мора да избере каде би се родил — исклучиво според квалитетот на здравствениот систем — која земја би ја одбрал? Тој напомнал дека во реалноста здравството не би било единствениот критериум, но сепак издвоил три држави.

„Убедливо најдобри се Холандија, Германија и Норвешка“, рекол тој, при што особено ја истакнал Холандија. „Тие, а особено Холандија и Норвешка, силно се потпираат на примарната здравствена заштита. До специјалист, по правило, се доаѓа преку матичниот лекар, кој е првата станица и своевиден ’филтер‘ на системот. Во Холандија, притоа, имаат можност за избор меѓу различни осигурителни компании (односно фондови), а системот силно ги регулира цените“, објаснил лекарот.

Ментално здравје

Емануел додал и дека во примарната здравствена заштита се посветува повеќе внимание на менталното здравје: „Ги поттикнуваат лекарите да се занимаваат и со менталното здравје на пациентите, па многу ординации имаат медицински сестри или друг персонал едуциран за таа област“. Ја нагласил и достапноста: „Лекарите или медицинските сестри се достапни 24 часа и имаат увид во вашиот здравствен картон“. Покрај тоа, споменал дека таквиот пристап остава повеќе простор за вложувања во други јавни потреби, како што се образованието, инфраструктурата и заштитата на животната средина.

Холандскиот здравствен систем и претходно честопати добивал пофалби. Според официјалните информации на холандското здравство, тој се потпира на неколку клучни начела: достапна грижа за сите, солидарност преку задолжително здравствено осигурување кое е достапно за сите, како и висок квалитет на здравствените услуги.