Американскиот актер Џош Раднор, најпознат по улогата на Тед Мозби во популарната серија „How I Met Your Mother“, стана татко на 51-годишна возраст. Тој и неговата сопруга Џордана Џејкобс го добија своето прво дете, син, а среќната вест актерот ја сподели со јавноста преку социјалните мрежи.
Раднор на „Инстаграм“ објави неколку семејни фотографии и откри дека нивниот син е роден пред неколку месеци. Иако не го наведе точниот датум на раѓање ниту името на момчето, со следбениците ги сподели своите емотивни први впечатоци за родителството.
„Мојата сопруга и јас добивме дете пред неколку месеци. Она што засега го знаеме е дека неговата насмевка ја исполнува целата просторија. Исклучително е внимателен и љубопитен, целосно се смирува кога му свирам гитара, а фразата ‘баба гануш’ му е неизмерно смешна. Тој е вистинско чудо и Џордана и јас сме пресреќни што е дел од нашиот живот“, напиша актерот.
Во објавата им се заблагодари и на слушателите на својот поткаст, каде што првпат ја спомена веста, и им се обрати на родителите на новороденчиња.
„Испраќам љубов до сите родители на бебиња. Тоа е истовремено лудо, прекрасно, исцрпувачко и длабоко емотивно искуство. Неизмерно сум благодарен“, додаде актерот.
Со пораката беа објавени и фотографии на кои се гледа Раднор како го држи својот син во прегратка, бебето легнато врз неговата гитара, како и неговата сопруга Џордана со новороденчето во болнички кревет.
Раднор се венчаше со Џордана Џејкобс во јануари 2024 година, а претходно во интервјуа зборуваше за тоа колку ужива во брачниот живот.
„Прекрасно е, навистина го сакам. Знам дека се очекува да го кажам тоа, но навистина така и мислам“, рече тој во еден од претходните разговори.
Зборувајќи за секојдневието, истакна дека најмногу му значат утрата и вечерите што ги поминува со сопругата.
„Понекогаш поради работата не се гледаме во текот на денот, па ми е особено драго што се будиме заедно и повторно се поврзуваме навечер. Секогаш си раскажуваме еден на друг како нѝ поминал денот“, изјави тој.
