Ново истражување сугерира дека поддршката на здравото стареење можеби не е толку комплицирана ниту скапа како што често се претставува на интернет. Иако често се промовираат скапи производи кои наводно го забавуваат стареењето, експертите истакнуваат дека многу работи се сведуваат на основни навики како квалитетен сон, редовна физичка активност и урамнотежена исхрана.
Проблемот е што многу возрасни, поради забрзаниот начин на живот и промените во апсорпцијата на хранливите материи со текот на годините, не внесуваат доволно витамини и минерали само преку исхраната. Токму затоа научниците сè повеќе истражуваат дали едноставни секојдневни навики можат да помогнат во зачувување на здравјето додека старееме.
Една од таквите навики е секојдневното земање мултивитамини. Истражувањето покажало дека редовното земање мултивитамини би можело умерено да го забави епигенетското стареење, односно промените во начинот на кој нашите гени функционираат со текот на времето.
Научниците сакале да проверат дали едноставен додаток во исхраната може да ги надомести нутритивните недостатоци кои често се појавуваат со возраста. Токму затоа спровеле истражување за да утврдат дали оваа навика може да направи разлика, пишува „EatingWell“.
Потребни се дополнителни истражувања
Студијата била спроведена во рамките на големото клиничко истражување „COSMOS“ и опфатила 958 возрасни лица со просечна возраст од 70 години. На почетокот истражувачите анализирале примероци од крв со цел, со помош на т.н. епигенетски часовници, да ја проценат биолошката возраст на учесниците и брзината на стареење на организмот.
Потоа учесниците биле случајно поделени во четири групи и во текот на две години секојдневно земале различни комбинации на додатоци во исхраната: мултивитамини, екстракт од какао или плацебо. Ваквиот дизајн им овозможил на научниците одделно да ги проценат ефектите на мултивитамините и какаото.
Резултатите покажале дека лицата кои секојдневно земале мултивитамини имале умерено побавен пораст на некои показатели на биолошко стареење во споредба со оние кои земале плацебо. Овој ефект бил поизразен кај учесниците кои на почетокот на студијата веќе покажувале знаци на забрзано стареење.
Екстрактот од какао не покажал значаен ефект врз епигенетските показатели на стареење. Истражувачите сепак нагласуваат дека се потребни дополнителни студии за да се утврди дали овие промени имаат долгорочни здравствени придобивки.
Денес
