Сребрениот медал од Зимските параолимписки игри Милано – Кортина 2026 донесе и една необична приказна од светот на спортот. Украинскиот биатлонец Максим Мурашковски откри дека голем дел од подготовките за натпреварувањето ги базирал на работа со „ChatGPT“, кој го опиша како „револуционерна технологија“.
Дваесет и петгодишниот Украинец го освои второто место во индивидуалната трка за натпреварувачи со оштетен вид, остварувајќи време од 33:41,1. Побрз од него беше само кинескиот натпреварувач Данг Хесонг, кој го освои златниот медал, додека третото место го зазеде неговиот сонародник Дмитро Сујарко, десет секунди зад Мурашковски.
Мурашковски се натпреварува во категоријата NS3, која е наменета за спортисти со поблаг степен на оштетување на видот.
По трката објасни колку технологијата на вештачката интелигенција била важен дел од неговиот процес на подготовка.
„Последните шест месеци тренирав со помош на „ChatGPT““, изјави Мурашковски.
„Не се работеше само за тактика. Тоа сочинуваше речиси половина од мојот тренинг-план, вклучувајќи мотивација и организација на тренинзите. Во суштина, огромен дел од мојата работа беше поврзан со тоа.“
Со него за време на трката беше и водичот на скии Виталиј Труша, со кого заедно го освоија сребрениот медал.
Украинскиот параолимпиец додаде дека „ChatGPT“ го користел во повеќе улоги.
„Го користев како психолог, тренер, а понекогаш дури и како доктор.“
Мурашковски истакна дека истиот метод му помогнал и за време на Светскиот куп во пара-биатлон во јануари, каде што исто така освоил неколку медали, меѓу кои и злато.
„И таму освоив неколку медали, дури и едно злато. Затоа можам да кажам дека „ChatGPT“ има големи заслуги за мојот напредок. Верувам во таа технологија, таа е револуционерна.“
На прашањето дали вештачката интелигенција во иднина би можела да ги замени тренерите, психолозите или лекарите, Мурашковски смета дека такво сценарио не е далеку.
„Не целосно во следните пет до десет години, но делумно – сигурно.“
Во пара-биатлонот водичите на скии не се задолжителни за натпреварувачите во категориите NS2 и NS3, но се обврзни за спортистите во категоријата NS1, кои според правилата на Меѓународната скијачка и сноуборд федерација имаат речиси целосно или целосно оштетување на видот.
За време на стрелачкиот дел од трката, натпреварувачите користат електронски пушки и акустични сигнали кои им помагаат да одредат колку се блиску до центарот на метата – колку сигналот е поинтензивен, толку погодокот е поблиску до центарот.
Употребата на вештачката интелигенција во спортот веќе не е реткост. Лора Харви, тренерка на тимот Сиетл Рејн од Националната женска фудбалска лига (NWSL), претходно откри дека во текот на сезоната 2025 користела „ChatGPT“ за да добие инспирација за тактички идеи.
Екипата Сиетл Рејн тогаш ја заврши сезоната како четврти носител во плејофот, но беше елиминирана во четвртфиналето од тимот Орландо Прајд.
Денес
