Редок Ducati од 100.000 евра во Скопје – лимитираниот "Panigale Lamborghini" изложен во салонот на Ducati Македонија

Еден од најретките и најексклузивните мотоцикли произведени од Ducati – моделот Ducati Panigale V4 Lamborghini – моментално може да се види во салонот на Ducati Македонија во Скопје.

Овој мотор е резултат на специјалната соработка помеѓу италијанските брендови Ducati и Lamborghini, при што дизајнот и деталите се инспирирани од суперспортските автомобили на Lamborghini.

Моделот е екстремно лимитиран – произведени се само 630 примероци за светскиот пазар, плус дополнителни 63 „Speciale Clienti“ верзии наменети исклучиво за сопственици на Lamborghini автомобили. Тоа значи дека вкупно постојат само 693 вакви мотоцикли во светот, што го прави вистинско колекционерско парче.

Panigale Lamborghini е базиран на платформата Ducati Panigale V4 и го придвижува моќниот 1103 cc V4 Desmosedici Stradale мотор кој развива околу 214 коњски сили. Благодарение на карбонските елементи, титаниумскиот издувен систем и специјалните лесни компоненти, тежината е значително намалена, што овозможува перформанси на ниво на тркачки мотоцикл.

Особено впечатлив е и дизајнот – моторот користи карбонски панели, уникатни фелни и специјална комбинација на бои, инспирирани од Lamborghini моделите, што му дава агресивен и препознатлив изглед.

Цената на овој редок мотоцикл се движи околу 100.000 евра, а поради неговата лимитирана серија и ексклузивност, ваквите модели често со текот на времето ја зголемуваат својата вредност, што ги прави привлечни и за колекционери.

Присуството на ваков редок Ducati во Скопје претставува вистинска реткост и можност љубителите на мотоцикли одблиску да видат еден од најексклузивните мотоцикли произведени од италијанскиот бренд.