Европската комесарка за проширување, Марта Кос, денес изјави дека процесот на реформи во Украина мора да се забрза, бидејќи безбедна Европа не може да постои без безбедна, демократска и просперитетна Украина како „една од нас“.
На прес-конференцијата, по неформалниот министерски состанок со Украина, таа рече дека за време на нејзиниот неодамнешен престој во таа земја, било „длабоко трогателно“ да се види дека членството во ЕУ им носи надеж на Украинците во нивниот секојдневен живот. Според неа, состанокот ја надградил работата започната минатиот декември во Лавов, каде што земјите-членки дале насоки за новата фаза од преговорите за пристапување на Украина фокусирани на три преговарачки кластери.
„Тие ѝ дадоа на Украина јасен список на обврски за техничката работа што претстои во областа на владеењето на правото и демократските институции, внатрешниот пазар и надворешните односи. Денес, ја продолжуваме оваа работа и ја прошируваме на преостанатите три поглавја од преговорите. Реформите според Кластер 3 ќе доведат до повеќе работни места, подобри услови за компаниите и поголеми инвестиции во украинската економија. Реформите според Кластер 4 значат почиста енергија, посигурна електрична енергија и подобри патишта, железнички врски и гранични врски. А реформите според Кластер 5 значат посилно земјоделство, подобра поддршка за руралните заедници и попаметно користење на земјиштето и водата“, рече Кос.
Таа додаде дека Украина има реална шанса да постигне побрз напредок во реформите што го подобруваат секојдневниот живот, од работни места и бизнис до енергија, транспорт и поддршка за руралните заедници, и дека во исто време, работата продолжува на акциониот план за 10-те реформски приоритети договорени во Лвов, со силен фокус на владеењето на правото, борбата против корупцијата и градењето силни, одговорни, демократски институции.
„Ова се темелите за интеграција на Украина во ЕУ, а воедно и основата за реконструкција и долгорочен просперитет на Украина. Во време кога Европа е под притисок и од Истокот и од Западот, не можеме да си дозволиме да губиме време. И не го сторивме тоа. Сега сите шест кластери се неформално отворени“, рече таа.
Таа објасни дека треба да се разликуваат два столба на процесот на пристапување, од кои едниот е техничката работа, додека остатокот е процесот на донесување одлуки во земјите-членки.
„Од техничка гледна точка, можеме да ги завршиме преговорите за сите кластери“, рече таа.
Заменичката министерка за европски прашања на Кипар, Марилена Рауна, изјави дека Украина не е сама и дека проширувањето на ЕУ кон Украина е инвестиција во мирот, стабилноста, демократијата и просперитетот на ЕУ, пренесува Танјуг.
„Посилна Украина во рамките на посилна Европска Унија ни користи на сите. Во исто време, ние остануваме водени од основните принципи на процесот на пристапување. Заслуги, напредок, ригорозна условеност и целосно усогласување со вредностите на ЕУ. Претседателството ќе продолжи тесно да соработува со Европската комисија и земјите-членки за да го одржи моментумот“, рече таа. Вицепремиерот на Украина за европски и евроатлантска интеграција, рече дека верува оти земјата наскоро ќе го отвори Кластер 1 и ѝ се заблагодари на ЕУ за нејзината помош.
