„Project Hail Mary“ како нефраншизен филм оствари успех каков што не е забележан од „Oppenheimer“. Овој филм со Рајан Гослинг во главната улога заработи околу 80,5 милиони долари од продажба на билети во текот на првиот викенд на прикажување во Северна Америка.
„EntTelligence“ проценува дека тоа значи приближно еден милион продадени билети. Без проблем го зазеде првото место на бокс-офис листите, надминувајќи ги очекувањата и испорачувајќи рекордно отворање за студиото „Amazon MGM“, чиј досегашен најдобар резултат беше „Creed III“ (58 милиони долари во 2023 година).
„Project Hail Mary“ исто така оствари второ најголемо отворање за нефраншизен филм, веднаш зад „Oppenheimer“, кој во 2023 започна со 82,4 милиони долари.
Сега е еден од само трите нефраншизни филмови во последната деценија кои стартувале со повеќе од 70 милиони долари (трет е „Us“ на Џордан Пил). Во доменот на модерните вселенски опери, ги надмина дебијата на филмовите „The Martian“, исто така адаптација на роман од Енди Вир, кој во 2015 започна со околу 54,3 милиони долари, „Gravity“ (55,6 милиони во 2013) и „Interstellar“ (47,5 милиони во 2014).
Режиран во тандем на Фил Лорд и Кристофер Милер, „Project Hail Mary“ чинеше приближно двојно повеќе од продукцискиот буџет на „Oppenheimer“, со цена во распон од околу 200 милиони долари. Сепак, филмот има и силни критики и оценки од публиката и би можел да биде предодреден за долготрајно прикажување. Според „PostTrak“ анкетите по излегување од кино, каде доби максимални пет од пет ѕвезди, 83 проценти од гледачите изјавиле дека дефинитивно би го препорачале филмот на пријатели. Половата структура на публиката била благо наклонета кон мажи (57 проценти), а 55 проценти од гледачите биле помлади од 35 години.
Дејството на филмот го следи ликот на Рајан Гослинг кој се буди сам, со многу малку сеќавања, на вселенски брод, каде што неговата главна мисија е обид да го спаси Сонцето од умирање. Како што стана стандард за „event“ филмови како „Project Hail Mary“, премиум форматите на големи платна беа исклучително барани и сочинуваа 56 проценти од викенд-заработката. Само „IMAX“ платната учествуваа со 24 проценти од вкупниот износ.
‘PROJECT HAIL MARY’ is Ryan Gosling's highest rated film on Rotten Tomatoes at 95%.
— DiscussingFilm (@DiscussingFilm) March 20, 2026
Read our review: https://t.co/xXbtre4S79 pic.twitter.com/P0jpmJ7wc0
„Длабоко веруваме во ‘Hail Mary’, а јасно е дека верува и публиката. Она што го гледаме во кината – енергијата, оценките по проекциите, препораките – сето тоа е она што верувавме дека овој филм ќе го исполни“, изјави Кевин Вилсон, шеф на домашната дистрибуција на „Amazon MGM Studios“.
Вториот голем холивудски новитет, „Ready or Not 2: Here I Come“ во дистрибуција на „Searchlight“, заврши дури на четвртото место со 9,1 милиони долари, зад анимираниот филм на „Disney“ и „Pixar“ – „Hoppers“ (18 милиони) и боливудското продолжение „Dhurandhar: The Revenge“, кое од петок до недела инкасираше 9,6 милиони долари. Адаптацијата на романот на Колин Хувер „Reminders of Him“ го заокружи топ 5 во својот втор викенд на прикажување со 8 милиони долари.
„Viva Pictures“ исто така пласираше анимирана адаптација на популарната детска книга „The Pout-Pout Fish“ во 1.854 кина и се очекува да заврши меѓу десетте најгледани наслови за викендот.
