Паразитските црви пронајдени во стари конзерви лосос не се знак за расипана риба, туку показател за здрав и стабилен морски екосистем. Истражувањето покажува дека нивното зголемување низ годините укажува на богат синџир на исхрана и присуство на морски цицачи, а старите конзерви служат како вреден извор за следење на промените во океаните.
Она што започнало како обична кутија со заборавени конзерви лосос од магацин, се претворило во вистинско научно богатство. Истражувачи од Универзитетот во Вашингтон отвориле конзерви лосос стари речиси половина век и наместо расипана риба, откриле неочекувани „сведоци“ на здравјето на океанот – паразитски црви кои всушност покажуваат дека екосистемот на Алјаска е во подобра состојба отколку што се мислело. Тимот, предводен од Натали Мастик и Челси Вуд, анализирал 178 конзерви лосос од четири вида, фатени во Заливот на Алјаска и Бристол Беј во периодот од 1979 до 2021 година.
Во месото од лососот пронашле зачувани паразити – морски нематоди долги околу еден сантиметар, кои угинале за време на процесот на конзервирање, но останале недопрени со децении. Повеќето луѓе црвите во рибата ги сметаат за знак дека нешто не е во ред. Но научниците велат токму спротивното.
„Сите претпоставуваат дека црвите во лососот значат дека нешто тргнало наопаку. Но животниот циклус на анисакидите го опфаќа целиот морски синџир на исхрана – од крил, преку помали риби, до лосос и на крај до морски цицачи. Нивното присуство всушност е знак дека рибата доаѓа од здрав екосистем“, објасни Челси Вуд.
Истражувањето покажало дека бројот на овие паразити во текот на 42 години се зголемил кај некои видови лосос, што може да укажува на стабилен или дури обновувачки морски екосистем. Можни причини се поголемиот број морски цицачи (во чии црева се размножуваат црвите), благ пораст на температурата на морето или подобрување на квалитетот на водата благодарение на построги еколошки прописи.
„Анисакидите можат да се размножуваат само во цревата на морските цицачи. Зголемувањето на нивниот број сугерира дека во текот на нашиот период имале повеќе можности за репродукција, што укажува на присуство на доволно домаќини во синџирот“, додаде Натали Мастик.
Ова откритие, објавено во списанието „Ecology and Evolution“, покажува дека старите конзерви риба можат да послужат како вистинска „временска машина“ за проучување на промените во океаните – без современи загадувања и со совршено зачувани примероци, пренесува „Newsweek“.
