Поранешниот извршен директор на „Google“ Мет Бритин беше назначен за нов генерален директор на британскиот јавен сервис „BBC“.

Тој на таа позиција ќе го замени Тим Дејви, кој ја објави својата оставка по контроверзноста поврзана со емисијата „Panorama“ и говорот на американскиот претседател Доналд Трамп.

Бритин (57), кој ги водеше операциите на „Google“ за Европа, Блискиот Исток и Африка, изјави дека „едвај чека да почне со работа“, оценувајќи дека ова е момент на „вистински ризик, но и одлична можност“.

„Повеќе од кога било ни е потребен силен „BBC“ кој работи во интерес на сите во еден сложен и брзо менувачки свет“, изјави Бритин, додавајќи дека медиумската куќа претставува „исклучителен британски капитал со повеќе од 100 години иновации“.

Меѓу приоритетите на новиот директор ќе биде решавањето на тужбата за клевета од повеќе милијарди американски долари поднесена против „BBC“ од Доналд Трамп, поради начинот на кој емисијата „Panorama“ ги монтирала деловите од неговиот говор од јануари 2021 година, за што „BBC“ веќе се извини.

Новата функција доаѓа во време кога „BBC“ се соочува со конкуренција од технолошките компании на дигиталниот пазар, како и во пресрет на истекот на сегашната кралска повелба во 2027 година.

Кој е Мет Бритин?

Бритин е роден во Волтон на Темза, округот Сари, и дипломирал на Универзитетот Кембриџ.

Тој ја започнал својата кариера во медиумскиот сектор и се приклучил на „Google“ во 2007 година, каде што напредувал до позицијата претседател за Европа, Блискиот Исток и Африка.

Откако ја напуштил технолошката компанија во 2025 година, тој зел, како што го опишал, „мини година пауза“, а потоа станал „неизвршен“ директор на медиумската група „The Guardian“.