Меѓутоа, зад оваа 25-годишна девојка која последниве години сè посигурно гради кариера во филмот, музиката и модата се крие живот одбележан со исклучително тешки загуби.

Нејзиното семејство се соочи со незамислива болка кога Ела имаше само девет години. Нејзиниот постар брат Џет, кој имаше аутизам, почина во 2009 година по несреќен случај, што целосно ги скрши нејзините родители. Среќата накратко им се насмевна кога една година подоцна го добија синот Бенџамин, но тој мир, за жал, не траеше долго.

Нејзината мајка, познатата актерка Кели Престон, тешко се разболе од рак на дојка и почина во 2020 година. Во целиот тој период на младата Ела сигурно не ѝ било нималку лесно, а секој од тие животни удари оставил сериозни последици врз нејзиното здравје и тело.

Се борела со прекумерна телесна тежина која во еден момент изгледала многу загрижувачки, но безрезервната поддршка од татко ѝ ѝ помогнала конечно да се врати во рамнотежа. Огромната љубов што Џон Траволта ја негува кон своите деца ѝ помогнала да ја врати нарушената самодоверба и да почне да го гради сопствениот пат.

Веганството како пресврт за подобар живот

Гостувајќи на еден популарен Јутјуб канал што го води Реми Моримото Парк, младата ѕвезда проговори за својот живот во Лос Анџелес и за една голема промена што неодамна ја направила. Инспирирана од советите на својата блиска пријателка, Ела пред неколку години одлучила да премине на вегански начин на исхрана и истакна дека таа одлука имала неверојатно позитивно влијание врз неа.

„Имав пријателка која веќе седум години беше веганка и ѝ велев колку е здрава и како сè ѝ оди добро, а таа ми кажа дека веќе со години е веганка“, раскажа Ела Блу Траволта.

Таа додаде дека ја пробала таквата исхрана и дека многу ѝ се допаднала, бидејќи се чувствувала одлично јадејќи исклучиво растителна храна.

„Тука се и сите причини поврзани со животната средина и заштитата на животните, сето тоа ми изгледаше одлично. Почнав сè повеќе да учам за тоа и колку повеќе дознавав, толку бев посигурна дека таквиот начин на живот навистина ми одговара“, рече таа.

Светла точка во уметноста

Токму со татко ѝ и мајка ѝ ги направи своите први чекори пред камерите во филмот „Old Dogs“ во трагичната 2009 година, а десет години подоцна со татко ѝ го сними трилерот „The Poison Rose“. Во меѓувреме доби и главна улога во модерна филмска адаптација на приказната за Алиса во земјата на чудата, а неодамна со татко ѝ повторно реализираше една интересна уметничка авантура.

Таа се појавува во неговото режисерско деби за златното доба на авијацијата каде игра стјуардеса, а овој проект е поканет и на овогодишниот фестивал во Кан. Сепак, нејзината вистинска љубов е музиката, па така објави албум со наслов „Colors of Love“, додека една од најемотивните песни „Little Bird“ ѝ ја посвети на својата покојна мајка.

Благодарение на својата природна убавина и софистициран стил, таа сè почесто привлекува внимание од големите брендови, се фотографира за насловни страници на познати магазини и чекори по пистите на модните недели.

И покрај сè, својот приватен живот успешно го држи далеку од јавноста, ретко е активна на социјалните мрежи и секогаш истакнува дека семејството ѝ е апсолутен приоритет. Нејзините објави главно се поврзани со работата, но никогаш не пропушта можност да им честита роденден на покојната мајка, на својот татко и на помладиот брат.