Познатата авиокомпанија укинува дел од летовите ширум Европа: Сѐ почнува од следниот месец...

„КЛМ ќе понуди 80 летови помалку во двата правци до и од аеродромот Шипхол во Амстердам, што претставува помалку од еден процент од нејзините европски летови“, се вели во соопштението на компанијата, која е подружница на „Ер Франс“, објави „Фигаро“.

Компанијата изјави дека ова се однесува на ограничен број летови во Европа кои, поради зголемувањето на цените на керозинот, повеќе не се финансиски профитабилни, додавајќи дека не станува збор за недостаток на тоа гориво.

Во посебна изјава, компанијата изрази и незадоволство од најавата на Холандија за зголемување на даноците за авионски билети за 2027 година, за кои се очекува дека ќе бидат повеќе од осум пати поголеми од просекот на Европската Унија.

Овој данок, кој беше 30 евра, останува непроменет за летови на растојанија пократки од 2.000 километри, но ќе се зголеми на 48 евра за летови на средни релации и на 72 евра за летови на долги релации.

„КЛМ предупреди дека повисоките даноци отколку во соседните земји би можеле да ги наведат патниците да користат аеродроми надвор од Холандија“, соопшти авиокомпанијата.