Маж заразен со хантавирус се лекува во Универзитетската болница во Цирих, објавија денес швајцарските власти, нагласувајќи дека во моментов нема опасност за населението на Швајцарија.
Пациентот претходно бил патник на луксузниот крузер „MV Hondius“, на кој избувна епидемија на хантавирус за време на пловидбата во Атлантскиот Океан.
Според податоците од Федералната канцеларија за јавно здравје (FOPH), мажот и неговата сопруга се вратиле од патување во Јужна Америка кон крајот на април. Откако покажал симптоми на болеста, се јавил во болницата во Цирих, каде што веднаш бил ставен во изолација.
Анализите спроведени во референтната лабораторија на Универзитетската болница во Женева го потврдија присуството на вирусот.
Неговата сопруга засега нема симптоми, но е во самоизолација како мерка на претпазливост. Кантоналните власти во моментов проверуваат дали заразениот маж бил во контакт со други луѓе по враќањето во земјата.
Европскиот сој на хантавирус најчесто се пренесува преку контакт со секрети од заразени глодари. Сепак, со варијантата позната како вирус на Андите, која беше откриена кај некои луѓе, пренос од човек на човек при близок контакт е регистриран и во ретки случаи, пишува „Swissinfo“.
Федералната канцеларија за јавно здравје проценува дека можноста за нови случаи во Швајцарија е мала и го проценува ризикот за населението како низок.
Хантавирусот е ретка болест во Швајцарија, каде што во последните години се регистрираат помеѓу нула и шест случаи годишно, а повеќето инфекции се поврзани со престој во странство.
Епидемијата се развила за време на неколкунеделното патување на крузерот што пловел од Аргентина до Антарктикот, а потоа преку Атлантскиот Океан, по патот пристанувајќи или поминувајќи покрај оддалечени острови додека првите случаи на болеста се појавиле кај патниците и членовите на екипажот.
Според операторите на крузери, СЗО и системите за следење на бродови, поминал речиси еден месец помеѓу моментот кога еден постар холандски патник се разболел и починал во Јужниот Атлантик и моментот кога лабораториските анализи во Република Јужна Африка, оддалечена повеќе од 3.500 километри, го потврдиле хантавирусот.
На бродот има речиси 150 патници и членови на екипажот од 23 земји, додека крузерот моментално чека дополнителни инструкции покрај брегот на Западна Африка.
Холандската компанија која управува со бродот организира таканаречени „експедициски крстарења“, кои вклучуваат патувања до Антарктикот и оддалечените острови на Јужниот Атлантик, познати по нивната недопрена природа и екстремно изолирани области.
Ваквите патувања можат да траат подолго од еден месец, а цената на аранжманот се движи од 6.000 до 25.000 долари, во зависност од видот на кабината.
