Блутут-слушалките денес ги користат голем број луѓе поради нивната практичност, но повремено повторно се отвора прашањето дали можат да бидат штетни за здравјето, особено кога станува збор за ризикот од рак на мозокот. Д-р Пуџа Пилај, специјалистка по интерна медицина од болницата „Aster CMI Hospital“, објаснила дека сепак нема докази дека блутут-слушалките предизвикуваат рак на мозокот.

„Ова тврдење е чест мит што здравствените експерти повеќепати го разјасниле. Блутут-уредите користат радиофреквентни сигнали со мала моќност за да се поврзат со телефонот, а нивото на зрачење што го произведуваат е значително пониско од она што го емитуваат мобилните телефони. Долгогодишните научни истражувања не покажале јасна или силна поврзаност меѓу блутут-уредите и ракот“, објаснила д-р Пилај.

Како што додала, меѓународните здравствени организации сметаат дека количината енергија што ја емитуваат слушалките не е доволна за да ги оштети клетките или ДНК на начин што би довел до развој на рак. Докторката објаснила и дека блутут-сигналот не се задржува на едно место, туку брзо слабее со оддалечувањето.

„Луѓето често се загрижени затоа што слушалките се носат блиску до главата, но и тогаш изложеноста е многу мала и се смета за безбедна“, рекла д-р Пилај.

Што навистина е проблем?

Сепак, експертите предупредуваат дека проблем може да биде прегласното слушање музика. Според „Cleveland Clinic“, знаците на оштетување на слухот предизвикано од бучава може да вклучуваат зуење во ушите, послабо регистрирање на високите тонови и отежнато следење разговори.

Посебен проблем е навиката луѓето да заспиваат со слушалки во ушите. Затоа експертите советуваат јачината на звукот да се држи на пониско ниво, да се ограничи времето на користење, да се избегнуваат режими за поништување на бучавата и слушалките редовно да се чистат.

Според препораките на Светската здравствена организација, јачината на звукот на уредите не треба да биде поголема од 60 отсто од максимумот, додека просечното ниво на звук треба да остане под 80 децибели.

„Секогаш е добро уредите да се користат умерено и да се почитуваат основните правила за безбедност“, заклучила д-р Пилај.