Пијалаци што го намалуваат дејството на лековите за алергија

Поголемиот дел од возрасните и децата можат безбедно да земаат фексофенадин, но лицата кои имале проблеми со црниот дроб, бубрезите или срцето треба претходно да се консултираат со лекар или фармацевт.

Според британската Национална здравствена служба – „NHS“, претпазливост е потребна и кај бремени жени, доилки и лица кои претходно имале алергиска реакција на антихистаминик или друг лек.

Сепак, многу е важно со што ја земате таблетата, бидејќи тоа директно може да влијае врз тоа дали лекот ќе делува правилно. Ова се лоши вести за љубителите на овошни сокови, пренесува „Index.hr“.

Сок од портокал

Ако сакате утрото да го започнете со чаша свежо цеден сок од портокал, можеби треба двапати да размислите.

Експертите од „Bolt Pharmacy“ предупредуваат дека сокот од портокал може значително да ја намали апсорпцијата на фексофенадинот.

Тоа се случува бидејќи соединенијата во пијалакот можат да ги блокираат транспортните протеини во ѕидовите на цревата, поради што лекот потешко се апсорбира и може да има послаб ефект.

Истражувањата покажуваат дека консумирањето сок од портокал заедно со овој лек може да ја намали неговата биорасположливост за околу една третина, па дури и повеќе.

Сок од грејпфрут

Како и сокот од портокал, така и сокот од грејпфрут може да ја намали ефикасноста на лекот.

„Сокот од грејпфрут може да предизвика помала количина фексофенадин да влезе во крвотокот, што ја намалува ефикасноста на лекот“, објаснила Шиев Меј Хуанг од американската Агенција за храна и лекови – „FDA“.

„FDA“ наведува дека и помелото – овошје од Југоисточна Азија со вкус сличен на благ грејпфрут – како и тангелото, хибриден цитрус, исто така можат да предизвикаат проблеми со апсорпцијата на фексофенадинот.

Сок од јаболко

Уште еден пијалак што треба да се избегнува е сокот од јаболко.

Ако течењето на носот и чешањето на очите не исчезнуваат дури ни по земањето таблета, причината можеби е токму чашата сок од јаболко.

Како и сокот од портокал и грејпфрут, и овој пијалак може да го наруши начинот на кој делува фексофенадинот.

„Овој пијалак може да влијае и на други лекови, како што се лекови за крвен притисок и бета-блокаторот атенолол“, изјавил медицинскиот антрополог Тери Грејдон за „Народна аптека“.

Алкохолот исто така е ризик

Со доаѓањето на потоплото време, многумина земаат антихистаминик пред излегување за да спречат алергиите да им го расипат денот.

Сепак, потребна е претпазливост, бидејќи „NHS“ предупредува дека алкохолот не треба да се консумира заедно со фексофенадин.

Здравствената служба наведува дека најдобро е да се избегнува алкохол, бидејќи може да предизвика поспаност и да ги зголеми несаканите ефекти, како што е вртоглавицата, кога се комбинира со лекот.

Порталот „Drugs.com“ советува лековите да се земаат исклучиво со вода, за телото правилно да може да ги апсорбира.