Истражувачите и лекарите објаснуваат дека заштитниот ефект е поврзан со антиоксидансите и соединенијата кои помагаат во намалување на воспаленијата и заштита на клетките на црниот дроб.

Сепак, предупредуваат дека слатките пијалаци со многу сируп и шеќер можат да ги поништат овие придобивки и да придонесат за развој на замастен црн дроб, пренесува „EatingWell“.

Како кафето му помага на црниот дроб?

„Поврзаноста меѓу кафето и здравјето на црниот дроб е едно од најконзистентно потврдените откритија во научната литература“, вели нутриционистката Јоана Кац за „Parade“.

Таа објаснува дека редовната консумација на кафе може да го намали ризикот од фиброза и цироза на црниот дроб, а најсилните ефекти се забележани кај луѓето кои пијат две до три шолји дневно.

Нутриционистката Витни Стјуарт додава дека кафето содржи полифеноли и дитерпени кои помагаат во намалување на воспаленијата и ги поддржуваат природните процеси на детоксикација во црниот дроб.

Стјуарт истакнува и дека кафето може да помогне во намалување на ензимите ALT и AST, чие ниво расте кога црниот дроб е под стрес или оштетен.

Таа додава дека редовната консумација на кафе е поврзана со помал ризик од безалкохолна масна болест на црниот дроб, фиброза и рак на црниот дроб.

Истражувачите исто така нагласуваат дека кафето е богато со антиоксиданси кои помагаат да се заштитат клетките на црниот дроб од долгорочно оштетување.

Важно е и како го пиете кафето

Иако црното или благо засладено кафе може да има заштитен ефект, нутриционистите предупредуваат дека големите количини шеќер, шлаг и сируп можат да имаат спротивен ефект.

„Важно е да се нагласи дека овие придобивки се однесуваат на црно или благо засладено кафе, а не на слатки кафе-пијалаци, кои всушност можат да придонесат за развој на замастен црн дроб – вели Стјуарт.

Покрај умерената консумација на кафе, експертите препорачуваат урамнотежена исхрана, редовна физичка активност и ограничување на алкохолот за зачувување на здравјето на црниот дроб.