Иако некои намирници можат да помогнат за здравјето на срцето, лекарите и нутриционистите предупредуваат дека одредена преработена храна може потајно да го покачи крвниот притисок.

Особено ги издвојуваат производите богати со натриум, шеќер и нездрави масти.

Според советниците за исхрана, ова се намирниците што најчесто треба да се ограничат.

Конзервирана храна

Нутриционистката Крутика Нанавати предупредува дека конзервираната храна често содржи големи количини натриум, шеќер и конзерванси.

„Во конзервираната храна понекогаш се додаваат големи количини натриум, шеќер или конзерванси за подобрување на вкусот“, вели таа за „SheFinds“.

Таа додава дека процесот на конзервирање може да ја намали количината на витамини чувствителни на топлина.

Советува да се избираат производи со помалку сол и шеќер, како и да се консумираат што повеќе свежо овошје и зеленчук.

Месни преработки

Кардиологот д-р Раед Баргаут вели дека месните преработки се меѓу најлошите избори за крвниот притисок и здравјето на срцето.

Нутриционистката Сузан Шахтер предупредува дека сланината, саламите и сувомеснатите производи се полни со натриум, нездрави масти и конзерванси, а можат да го зголемат ризикот од хипертензија и висок холестерол.

Чипс и солени грицки

Нанавати предупредува дека чипсот, переци и сличните грицки можат да го покачат крвниот притисок поради големата количина сол.

„Натриумот предизвикува задржување вода во телото, што дополнително ги оптоварува крвните садови“, објаснува таа.

Нутриционистката Триста Бест особено ги издвојува чипсовите како „Doritos“, бидејќи содржат рафинирани јаглехидрати, вештачки адитиви и масла што предизвикуваат воспаленија.

Како подобар избор се препорачуваат несолени јаткасти плодови, печен наут или пуканки подготвени без многу сол.

Благи печива и колачи

Нанавати предупредува дека преработените слатки често содржат многу калории и шеќер, а многу малку корисни хранливи материи.

„Прекумерната консумација на слатки грицки може да доведе до дебелеење, што е уште еден фактор на ризик за висок крвен притисок“, истакнува таа.

Таа додава дека наглите скокови на шеќерот во крвта исто така можат да придонесат за хипертензија.

Како поздрави алтернативи предлага овошје, јогурт со шумско овошје и темно чоколадо.

Житарки и печива за појадок

Нутриционистката Дестини Муди предупредува дека многу житарки за појадок содржат големи количини шеќер и многу малку влакна.

„Дури и брендовите што се рекламираат како здрави имаат низок удел на влакна“, нагласува таа.

Нутриционистот Џеси Федер додава дека и печивата можат да содржат изненадувачки големи количини натриум – понекогаш и до 800 милиграми по парче.

Поради тоа, тој препорачува леб и производи од интегрални житарки како поздрав избор.