Кога станува збор за навиките што можат да го намалат ризикот од рак, онколозите нагласуваат дека не станува збор само за избегнување на цигари, туку и за секојдневни избори како што е исхраната.
„Исхраната е клучна за целокупното здравје, вклучително и намалувањето на ризикот од рак“, вели онкологот д-р Крушанги Пател за „Парада“.
Таа додава дека исхраната влијае на воспаленијата, нивото на шеќер во крвта и способноста на клетките сами да се обновуваат, пренесува „Јаху!Лајф“ (Yahoo!Life).
Тројца онколози се согласуваат дека еден од најдобрите појадоци за превенција од рак е комбинација од јајца и лиснат зелен зеленчук како спанаќ или кељ.
„Ако го започнете денот со протеини и растенија, донесувате одлуки за кои вашето тело ќе ви биде благодарно и денес и за многу години“, вели д-р Пател.
Тој истакнува дека јајцата содржат протеини и антиоксиданти како лутеин и зеаксантин, кои помагаат во намалувањето на оксидативниот стрес и ги штитат клетките од оштетување.
Онкологот д-р Синду Наир предупредува дека начинот на кој ги подготвувате игра голема улога.
„Пржените јајца не се толку здрави како варените или лесно приготвените кајгани“, вели таа.
Доктор Наир додава и дека јајцата подобро е да се комбинираат со зеленчук отколку со преработено месо како колбаси или сланина.
Слично мислење има и онкологот д-р Андре Гој, кој тврди дека го лиснатиот зелен зеленчук е „основа на исхраната за превенција од рак“. Тој објаснува дека тие содржат соединенија кои можат да помогнат во заштитата на ДНК и да го намалат ризикот од одредени видови рак, особено од карцином на дебелото црево. Тој особено ги издвојува кељот и зелката поради соединенијата што помагаат во неутрализирање на канцерогените материи.
Д-р Гој, исто така, препорачува и други здрави појадоци, како што се овесна каша со бобинки и јаткасти плодови, кајгана од тофу и зеленчук или грчки јогурт со семки и цитрусни овошја. Д-р Пател советува секој појадок да содржи протеини и влакна, како и предност да се дава на минимално преработените намирници.
