Топлотната купола ја „проголта“ Европа: Стариот континент погоден од екстремни жештини, температурата во Лондон за неколку дена се зголемила за 20 степени

Европа буквално врие под налетот на „топлината купола“, која во мај донесе температури и до 10 степени над просекот за ова време од годината, претворајќи ја пролетта во жежок август. На плоштадот Плаза Мајор во Мадрид, шокираните туристи барале спас во сенките на аркадите, вклучувајќи ја и брачната двојка од Сиднеј која пристигнала целосно неподготвена.

„Ова воопшто не се температурите што ги очекувавме. Донесовме слоевита облека, мислевме дека ќе биде кул“, признале Џим и Марина за „Гардијан“.

Додека многумина, како семејството Дајмонд од Британија, бегале во климатизирани хотели, Перуанецот Фабрицио Деза со часови стоел во костум на Кинг Конг на жештината.

„Денес не е толку страшно. Налето ќе биде уште полошо“, вели овој млад човек кој пие по три литри вода дневно за да го помине работниот ден носејќи маска.

Ситуацијата не е полесна ниту во остатокот од континентот, каде што Париз и Лондон станаа вистински „фурни“ на отворено. Студентката по психологија Дарси вели дека температурите во малите париски поткровја станале речиси неподносливи, додека нејзината пријателка Габи, студентка по екологија, нè потсетува дека овие екстреми стануваат наше секојдневие. Неверојатен скок на температурата е забележан во Лондон, каде што живата во термометарот скокна од 14 на дури 34 степени за само неколку дена, оставајќи ги посетителите од Америка во целосно неверување поради ненадејната промена на климата.

Бизарни сцени биле забележани и во Даблин, каде што туристи од Египет пристигнале опремени со зимски јакни и мантили, очекувајќи го познатиот ирски дожд.

„Не донесов никакви летни работи. Очекував да биде ветровито и влажно. Не го очекував ова“, изјавил Манал Јусеф.

Во исто време, луѓето кои живеат во Берлин бараат спас на езерата бидејќи градската инфраструктура нема решение за ваков вид топлина.

„Навикнати сме на овие температури, но сме навикнати и на климатизација, а Берлин ја нема“, истакнал Даниел Санс од Перу, додека неговата пријателка Ана Викторија Асеведо предупредува дека, без итни промени, се соочуваме со иднина во која условите за живот ќе бидат тешки за поднесување.