Во медицински потфат што звучи како сцена од научнофантастичен филм, лекар во Кина извршил операција на пациент во Бразил, на оддалеченост од речиси 19.000 километри.
Операцијата била изведена на 20 мај 2026 година и е претставена како една од најдолгите телехируршки процедури во светот, пренесуваат светските медиуми.
Роботска телехирургија ги поврзала градот Вухан во Кина и Порто Алегре во бразилската сојузна држава Рио Гранде до Сул, при што била извршена интервенција за отстранување на жолчното ќесе кај 47-годишен пациент во болницата „Мај де Деус“.
Операцијата ја извршил општиот и роботски хирург Норберто Мартинс, кој од далечина управувал со роботскиот систем „Тумаи“, додека медицинскиот тим бил присутен во хируршкиот центар во Бразил.
Според извештаите, растојанието меѓу Вухан и Порто Алегре изнесува околу 18.900 километри по воздушна линија, а интервенцијата била дел од меѓународна научна програма и медицински конгрес за хепато-панкреато-билијарна хирургија.
Хирургот се наоѓал во Вухан, од каде ги издавал командите, додека роботските раце во Бразил ги репродуцирале неговите движења речиси во реално време, со доцнење од околу 200 милисекунди.
Постапката била лапароскопска холецистектомија, односно отстранување на жолчното ќесе.
Локалните медицински тимови во Бразил ја следеле целата операција, а интервенцијата, според првичните информации, поминала успешно.
Експертите објаснуваат дека роботската хирургија е минимално инвазивна техника, при што наместо големи резови се користат мали отвори низ кои се воведуваат камера и инструменти управувани од роботски систем.
Меѓу предностите на ваквата технологија се зголемената прецизност, стабилноста на движењата и намалувањето на човечкиот тремор, што овозможува поголема безбедност при деликатни интервенции.
Роботскиот систем „Тумаи“ е опишан како напредна платформа за телехирургија, а болницата во Порто Алегре се смета за една од првите во регионот што ја вовела оваа технологија.
Според податоците од болницата, преносот на движењата од Вухан до Бразил се одвивал со исклучително мало задоцнување, што овозможило високо ниво на прецизност при изведување на операцијата.
Овој медицински подвиг се смета за значаен чекор во развојот на роботската хирургија, со цел намалување на географските бариери и овозможување пристап до врвни специјалисти на големи растојанија.
