Една земја од ЕУ наголемо тргува со Русија - еве што ѝ испорачува цело време...

Високата претставничка на Европската Унија за надворешна политика, Каја Калас, изјави, по повод откритието дека Ирска испорачува огромни количини алуминиум во Русија, дека извозот на алуминиум во таа земја не е предмет на санкции.

Таа додала дека ЕУ треба „да биде покреативна во наоѓањето начини“ за запирање на војната во Украина.

„Секогаш кога добиваме информации што ѝ помагаат на Русија на еден или друг начин, тогаш треба да бидеме покреативни во наоѓањето начини всушност да ја запреме оваа војна. Бидејќи ако постои сознание дека некои од нас во исто време продолжуваат да имаат корист од трговијата со Русија, кога тоа всушност им го олеснува финансирањето на оваа војна, тогаш оваа војна никогаш нема да запре“, изјавила Калас на прес-конференција по пристигнувањето на Кипар, според веб-страницата на дипломатската служба на ЕУ.

Калас изјавила дека фокусот на санкциите на ЕУ против Русија е да се спречи понатамошно финансирање на војната во Украина, за да не можат всушност да продолжат со неа.

„Бидејќи војните завршуваат и кога агресорите ќе останат без пари“, истакнала Калас.

Кога еден новинар ја прашал дали ирската влада има морална одговорност да размисли за запирање на трговијата со Русија, Калас одговорила дека извозот на алуминиум во Русија „не е под санкции“.

„Тоа е апсолутно точно. Мислам дека тоа е она што треба да го истражиме. Можеби треба да воведеме и санкции ако (алуминиумот) толку многу ѝ помага на Русија во финансирањето на оваа војна“, изјавила Калас пред неформалниот состанок на министрите за одбрана на ЕУ во Кипар.