Холивудскиот актер Роберт де Ниро повторно остро го нападнал американскиот претседател Доналд Трамп, тврдејќи дека САД повеќе не се земја што може да ја сака додека тој е на власт.
Имено, 82-годишниот актер ги изнел овие ставови за време на настанот „Rise Up, Sing Out“ во градското собрание во Њујорк. Говорејќи пред публиката, Де Ниро ја споредил љубовта кон Америка под водство на Трамп со насилна врска.
„Нашата земја во моментов не е толку достојна за љубов. Не сакам да го кажам тоа, но љубовта кон нашата земја почнува да звучи како кога злоставуван сопружник вели дека го сака својот злоставувач“, истакнал тој.
Актерот потоа почнал да ја критикува администрацијата на Трамп, осудувајќи ги американската надворешна политика, спроведувањето на законите за имиграција и реформите во здравствената заштита.
„Не можам да сакам земја што започнува глупави и нехумани војни. Не можам да сакам земја што им ја одзема здравствената заштита на милиони луѓе и ги користи тие пари за да ги збогати своите пријатели од класата на Трамп и Епстин. Не можам да сакам земја што испраќа маскирани полицајци да пукаат врз граѓани на улиците, да ги малтретираат нашите соседи и да разделуваат семејства“, рекол актерот.
Де Ниро најострата критика ја упатил кон самиот претседател, нарекувајќи го Трамп расистичен, мизогин и ксенофобичен тиранин.
„Дозволете ми да кажам само уште ова: Не можам да сакам земја предводена од Доналд Трамп“, нагласил актерот.
Неговите коментари предизвикале долг аплауз од присутните, поради што актерот накратко застанал пред да продолжи со говорот.
Сепак, Де Ниро нагласил дека неговата фрустрација произлегува од приврзаноста кон САД, а не од отфрлањето.
„Секако, поголемиот дел од својот живот ја сакав оваа земја. Соединетите Американски Држави ги пречекаа моите предци имигранти. На мене, на моето семејство и на моите сограѓани ни овозможија толку многу можности и извонредни слободи. Сакам повторно да ја сакам својата земја. Сакам да си ја вратам земјата“, порачал Де Ниро.
На настанот присуствувале и бројни познати холивудски ѕвезди, меѓу кои Џејн Фонда и Џулија Робертс. Робертс им порачала на присутните да не се исклучуваат од политиката и покрај исцрпувачкиот циклус на вести.
„Сите се чувствуваме како да не можеме да ги вклучиме вестите и дека не сакаме да ги слушаме, но мора да ги слушнеме; мора да се соочиме со тоа“, нагласила Робертс.
Таа, исто така, ѝ оддала емотивна почит на Рене Никол Гуд, американска државјанка која беше убиена од припадник на ИЦЕ (американската Служба за имиграција и царини).
Потсетуваме, говорот на Де Ниро е само еден од последните судири меѓу него и Трамп. Актерот со години е еден од најгласните критичари на претседателот меѓу познатите личности, честопати користејќи интервјуа, доделувања награди и политички настани за да го осуди неговото раководење.
