Сепак, таа нагласува дека ниту една намирница сама по себе не може да предизвика затнување на артериите.

„Срцевите заболувања ретко се последица на една единствена намирница или на еден нездрав викенд. Проблемот настанува поради навиките што се таложат со години“, објаснува докторката за „Parade“.

Најголемиот проблем, според д-р Вадали, претставува редовната консумација на преработено месо, како што се колбасите или сувомесните производи во сендвичите. Ваквите намирници содржат големи количини заситени масти, сол и конзерванси.

„Редовната консумација може да придонесе за зголемување на LDL холестеролот, висок крвен притисок и воспалителни процеси, а сето тоа со текот на времето го зголемува кардиоваскуларниот ризик“, предупредува таа.

Што покажуваат истражувањата?

Мета-анализа објавена во 2023 година во „European Heart Journal“ ги поврза преработеното и непреработеното црвено месо со поголем ризик од кардиоваскуларни заболувања.

Друго истражување покажало дека редовната консумација на црвено месо може да го забрза наталожувањето на плаки во артериите кај лица со покачен крвен притисок.

Затоа, д-р Вадали советува умереност.

„Не би препорачала да го јадете неколку пати неделно“, вели таа.

Наместо преработено месо, таа препорачува да се избираат немасно пилешко месо, риба и мешунки.

Како примери за поздрави вечери ги наведува пилешко месо на скара со зеленчук и ориз или лосос со зеленчук.

„Наместо да се фокусирате на тоа што треба да исфрлите од исхраната, размислете што можете да додадете“, советува таа.

На крајот истакнува дека малите, но редовни промени можат да имаат големо влијание врз здравјето на срцето.

Таа додава дека плаките во артериите често се наталожуваат со години пред да се појават првите симптоми.

Поради тоа, препорачува редовни лекарски прегледи и исхрана која се темели на минимално преработени намирници.