Откако дал отказ од работа и тргнал на патување низ Азија со ранец, решил токму овој камп да биде неговата прва станица. Целиот процес го документирал на ТикТок.

Пред да пристигне во Кина, тој веќе направил голем чекор и самостојно ослабел речиси 50 килограми.

Неговата цел била да ослабе уште неколку килограми

Хелгесен, кој претходно работел како системски техничар, ја намалил својата тежина од 133 на околу 83 килограми, но сакал да направи уште еден чекор за да ја достигне посакуваната цел.

Затоа поминал четири недели во кампот „Jianfeidaren“ во Шенжен, каде програмата вклучува секојдневни тренинзи, однапред утврдени оброци, лекарски контроли и психолошка поддршка. Своите искуства редовно ги објавувал на ТикТок под профилот „@imhelgis“

„Ми изготвија распоред и план на исхрана, но можев и да мамам ако сакав. Се изненадив кога сфатив дека, исто како и дома, на крајот сè зависеше од мојата лична одговорност“, изјавил Андре за Мирор.

Тренинзи секој ден и строги правила за исхрана

Андре особено ги пофалил тренерите, кои, како што рекол, цело време тренирале заедно со учесниците. Додал дека персоналот бил многу љубезен и му пружал голема поддршка и покрај тоа што комуницирале со помош на превод поради јазичната бариера.

Секој ден вклучувал три тренинзи, а целта на програмата била да се создаде калориски дефицит од околу 1.000 калории. За Андре тоа значело дека дневно внесувал приближно 1.300 калории.

Сепак, најтешкиот дел за него не бил само вежбањето, туку и распоредот на исхрана. Вечерата се служела веќе во 17 часот, додека појадокот бил дури во 8 часот следното утро.

„Беше навистина тешко да се издржи толку долго без храна. Искрено, некои денови не успевав, па ќе купев јаболко. Тоа не беше голем прекршок, но значеше дека не го следев планот целосно“, признал тој.

Промената не била само физичка

По 28 дена во кампот, Андре ослабел уште три килограми, со што неговото вкупно намалување на телесната тежина достигнало 51 килограм.

Сепак, рекол дека бројката на вагата не била најважниот дел од целото искуство. За него многу поважна била промената во начинот на кој се гледа самиот себеси.

„Не станува збор само за кампот, туку и за целиот идентитет на личност со вишок килограми. Конечно можам да престанам да се дефинирам како ’оној крупниот‘ и едноставно да бидам јас“, изјавил тој.

„Чувството беше прекрасно, но најмногу почувствував олеснување и внатрешен мир. Целата моја несигурност едноставно исчезна“, заклучил тој.