Силен топлотен бран ја зафати Европа, па Италија во четвртокот ги стави сите поголеми градови на највисок степен на предупредување, додека Австрија забележа рекордна температура.
Температурите во повеќе европски земји надминаа 40 степени Целзиусови, што предизвика здравствени предупредувања за милиони луѓе и дополнително ја оптовари енергетската, сообраќајната и туристичката инфраструктура. Властите и научниците предупредуваат дека ваквите екстремни настани стануваат сè почести и поинтензивни со загревањето на климата.
Италијанското Министерство за здравство ги стави сите 27 градови од националниот систем за следење на топлотните бранови под црвен аларм, што е првпат оваа година целата мрежа истовремено да биде под највисок степен на предупредување. Предупредувањата важат од Трст до Палермо и се однесуваат на целото население, а не само на постарите лица и хронично болните. На граѓаните и туристите им е препорачано да избегнуваат директно сонце во најтоплиот дел од денот, да престојуваат во затворени простории и да пијат многу вода.
Жештините доведоа и до промени на туристичките локации, па министерствата за туризам и култура го продолжија вечерното работно време на Колосеумот и Пантеонот во Рим. На влезовите во Колосеумот се поставени вентилатори со водена магла, а воведени се и дополнителни медицински станици.
Највисоката температура е измерена во Австрија, каде што во средата во местото Бад Дојч-Алтенбург, во близина на словачката граница, се регистрирани 41,2 степени Целзиусови, што претставува национален рекорд. Земјата истовремено се соочува со сериозна суша, бидејќи количината на врнежи од 1 јануари до 30 јуни била 27 проценти под долгорочниот просек, додека некои источни делови добиле само половина од вообичаените врнежи.
Сушата предизвика нарушувања и во Унгарија, каде што нискиот водостој на Дунав сериозно ја погоди единствената нуклеарна централа во земјата, која користи речна вода за ладење на реакторите. Производството е намалено на околу 10 проценти од вообичаениот капацитет, па владата воведе итни мерки за заштеда на електрична енергија и го ограничи товарниот железнички сообраќај во вечерните часови.
Во Германија расте загриженоста поради последиците од нискиот водостој на Рајна и другите реки врз индустријата и речниот транспорт. Во југоисточна Франција, пожарникарите и понатаму го надгледуваат големиот пожар во регионот Вар, кој од 20 јули изгорел повеќе од 60 квадратни километри и останува под ризик од повторно активирање поради силниот ветер и сувото тло.
Врвот на топлотниот бран во четвртокот го зафати и Балканот. Во Србија пожарникарите гасеа повеќе пожари, вклучувајќи голем пожар во боровите шуми западно од Белград и друг кај Краљево, додека во Хрватска туристите во Дубровник бараа засолниште од сонцето и ги избегнуваа плажите во најтоплиот дел од денот.
