Милев, кој е сопственик на „Жито клас Силбо“, од минатиот месец е управител на „Авто Испитен Центар ДООЕЛ Скопје“, како и на неговите сообраќајни центри во Карпош, Центар, Чаир, Аеродром и Гази Баба.

Промена има и во сопственичката структура на компанијата. Од јули како нов сопственик на „Авто Испитен Центар Скопје“ се води Александар Карафиловски, кој доаѓа на местото на досегашниот сопственик Виктор Серафимов. Милев, пак, на управителската позиција ја наследува Мирјана Бошковска.

Станува збор за компанија со значителен обем на работа. Според податоците за минатата година, друштвото остварило приходи од речиси два милиони евра и имало 48 вработени.

Приватна компанија со дејност од големо јавно значење

„Авто Испитен Центар Скопје“ е приватно друштво, но врши дејност од непосредно јавно значење – организирање и спроведување на испитите за идните возачи во Скопје.

Преку центарот кандидатите ги полагаат теоретскиот и практичниот дел од возачкиот испит за сите категории и национални категории моторни возила.

За една компанија да може да ја врши оваа дејност, потребна е лиценца од Министерството за внатрешни работи, а операторот мора да ги исполнува пропишаните просторни, кадровски и технички услови.

„Авто Испитен Центар Скопје“ го презеде организирањето на возачките испити во главниот град во 2018 година, кога го замени претходниот оператор „АМСМ Испитен центар“.

Изборот уште во 2018 година предизвика политички реакции

Начинот на кој компанијата влезе во бизнисот со возачките испити уште тогаш беше предмет на јавни и политички реакции.

Според медиумските извештаи од тој период, компанијата била формирана на 19 јуни 2018 година, само неколку дена пред Министерството за внатрешни работи да го објави конкурсот по кој подоцна ја добила лиценцата за спроведување на испитите во Скопје.

Како сопственик и управител тогаш бил наведен Виктор Серафимов, кој во тој период имал 26 години.

Фактот дека новоформирано друштво доби право да врши профитабилна и строго регулирана дејност стана тема на политички препукувања. Во дел од медиумите, како и во изјави на политички опоненти, се изнесуваа тврдења за наводна блискост меѓу Серафимов и тогашниот министер за внатрешни работи Оливер Спасовски. Се појавија и шпекулации дека двајцата биле кумови.

Стануваше збор за политички и медиумски тврдења од тој период, а не за факти утврдени со самата постапка за избор на оператор.

Лиценцираните оператори практично го контролираат пазарот во својот регион

Спроведувањето на возачките испити во земјава е специфична дејност бидејќи ја вршат приватни компании кои претходно мора да добијат лиценца од државата. Откако ќе бидат избрани за одредено подрачје, тие практично стануваат единствени оператори за организирање на теоретските и практичните испити во тој регион.

Слични реакции имаше и околу изборот на оператор за Пелагонискиот регион.

Компанијата „Супер возач“ била основана во август 2024 година, околу три месеци пред распишувањето на првиот конкурс за избор на фирма што ќе го води испитниот центар во тој регион.

Сопственик на „Супер возач“ е кичевската компанија „Стрит рајд“, која, пак, била формирана само неколку дена пред „Супер возач“. Како сопственик на „Стрит рајд“ се води Филип Митрески, кој претходно бил советник во Советот на Општина Кичево од редовите на ВМРО-ДПМНЕ.

Со последните промени во „Авто Испитен Центар Скопје“, компанијата што го контролира спроведувањето на возачките испити во најголемиот регион во земјата сега добива и нов сопственик и нов управител, а на нејзино чело застанува бизнисмен познат пред сè по пекарскиот бренд „Силбо“.

Добри финансиски резултати бележи и компанијата „Жито клас Силбо“. Според податоците на Македонското кредитно биро, во 2025 година друштвото остварило приходи од 338,5 милиони денари, или околу 5,5 милиони евра, додека добивката достигнала 91 милион денари, односно приближно 1,48 милиони евра. Во однос на 2024 година, приходите се зголемени за околу 12 отсто, а добивката за повеќе од 20 отсто.

Особено впечатлив е растот во подолг период – во 2021 година компанијата имала приходи од 187,2 милиони денари и добивка од 24,9 милиони денари, што значи дека за четири години приходите се зголемиле за околу 81 отсто, додека добивката е повеќе од тројно зголемена. Во 2025 година „Жито клас Силбо“ имало 95 вработени, наспроти 83 во 2021 година, а профитната маржа изнесувала околу 27 отсто.

Друштво за производство, трговија и услуги ЖИТО КЛАС СИЛБО ДООЕЛ Скопје

Извор: Македонско кредитно биро