Осумгодишно девојче од Луизијана почина по зараза со ретка амеба што го јаде мозокот, добиена додека пливало во езеро. Оваа инфекција е многу ретка, но скоро секогаш фатална и се шири поради затоплувањето на водите во САД.
Осумгодишно девојче од американската држава Луизијана починало откако се заразило со ретката амеба Naegleria fowleri, позната како „амеба што го јаде мозокот“. Се верува дека ја добила инфекцијата додека пливала во езеро недалеку од нејзиниот дом.
Лилијан Смарт, од Растон, северна Луизијана, починала за време на викендот во болница, кратко по прославата на својот осми роденден. Нејзините родители рекле дека инфекцијата предизвикала сериозен оток на мозокот.
„Синоќа, Лилијан отиде од нашите раце во рацете на Исус“, објави семејството.
„Оштетувањето на мозокот беше преголемо и нејзиното мало тело не можеше да се опорави“, додадоа тие.
Министерството за здравство на Луизијана минатата недела објави дека едно лице можеби се заразило со амебата додека пливало во езерото Клејборн, на околу 50 километри од Растон. Иако властите не го објавија идентитетот, семејството го потврди случајот.
Оваа микроскопска амеба живее во топла свежа вода. Инфекцијата се јавува кога контаминираната вода влегува во телото преку носот, од каде што амебата може да стигне до мозокот.
Здравствените власти нагласуваат дека инфекцијата не се пренесува преку пиење контаминирана вода или од човек на човек.
„Инфекцијата е исклучително ретка, но речиси секогаш фатална“, предупреди Министерството за здравство.
Инфекциите се редки. Од 1937 до 2025 година биле потврдени 180 случаи, од кои три во Луизијана.
Повеќето случаи се во јужниот и централниот дел на САД, каде високите температури го погодуваат ширењето на амебата. Климатските промени и затоплувањето на водата можат да го проширaт нејзиниот сегашен предел.
Според Американските центри за контрола и превенција на болести (CDC), симптомите се: главоболка, висока температура, гадење и повраќање. Болеста брзо напредува.
Подоцна може да се појават вкочанетост на вратот, конфузија, халуцинации и проблеми со рамнотежата.
Почна со температура
Лилијан била на интензивна нега. Мајка ѝ рече дека била пренесена во болница поради висока температура и двојно гледање.
Локалните жители и бизниси во Растон организирале собирање средства за семејството.
„Таа беше секогаш среќно дете со насмевка на лицето“, изјавил локален претприемач.
По нејзината смрт, родителите се збогувале со емотивна порака.
„Сите направија сè што можеше за да ја задржат со нас. Срцата ни се скршени и не знаеме што понатаму“, напишале тие.
Слични случаи се пријавени во САД. Во 2023 година жител на Џорџија починал од оваа амеба, а во 2022 едно дете почина во Небраска по пливање во слатка вода.
