Автор на серијата е Џорџ Кеј, познат по хитовите „Lupin“ и „Hijack“, а на страницата Ротен Томатос веќе има 86 отсто позитивни оценки.

Дејството на серијата

Приказната го следи детективот Томас, кој по бруталното убиство на двајца полицајци мора да соработува со својот татко Алфред, пензиониран детектив. Тие двајца со години не разговараат, но мораат да ги остават несогласувањата настрана за да го фатат убиецот кој за свои жртви ги избира полицајците.

Официјалниот синопсис открива повеќе детали: „Лето е во Стокхолм, период кога темнината всушност никогаш не паѓа. Полицијата добива повик за провала во куќа. Двајца полицајци одат на адресата, летниковец во архипелагот, но таму не наоѓаат никого – барем не на прв поглед.

Следниот ден се пронајдени нивните тела; станува збор за брутално злосторство. Тоа е почетокот на серијата застрашувачки убиства во кои, се чини, жртви се исклучиво полицајци. Главниот детектив мора да побара помош од својот татко, пензиониран полицаец, за да го решат случајот“.

Реакции на публиката

Гледачите почнаа да ги споделуваат своите впечатоци на социјалните мрежи, каде што серијата ја опишуваат како напната и ја препорачуваат за гледање. „Ги обожавам ваквите серии што се гледаат во една ноќ. Одлична е“, напиша еден корисник. Друг ја опиша драмата како „неверојатна“.

„Секогаш ќе тврдам дека европските криминалистички трилери се без конкуренција. Ја изгледав шведската серија #BloodSacrifice на Нетфликс во еден здив и навистина е одлична“, стои во една објава. Уште еден коментар гласи: „Тукушто ја изгледав првата епизода од врвниот шведски трилер #BloodSacrifice на Нетфликс. Приказната веднаш ве вовлекува, а главниот актер е одличен. Топла препорака!“.

Актерска екипа

Улогата на детективот Томас ја толкува Јакоб Офтефро („Агент Хамилтон“) додека неговиот татко Алфред го игра Петер Андерсон („Мажи кои ги мразат жените“). Во официјална изјава, Офтефро ја опиша серијата како „интензивно и емотивно патување“.

„Томас е човек кој ѝ го посветил животот на полицијата, но кога нападите ќе го погодат неговиот свет, тој е принуден да се соочи не само со брутален убиец, туку и со комплицираниот однос со својот татко. Улогата беше предизвикувачка и многу благодарна. Тоа е приказна за правдата, лојалноста и последиците од минатото кои не можат да се игнорираат“, изјави актерот.

Покрај нив, во серијата глумат и Електра Халман, Александар Абдалах, Хенрик Норлен, Лисет Т. Паглер, Магнус Крепер, Ирина Бјорклунд, Андерс Мослинг и Ана Марија Кал.

Серијата „Blood Sacrifice“ е достапна за гледање на Нетфликс.