Истражување објавено во списанието „European Journal of Clinical Nutrition“ покажало дека времето на консумирање на појадокот кај лицата постари од 40 години би можело да биде поврзано со должината на животот и ризикот од прерана смрт.
Истражувањето опфатило повеќе од 31.000 возрасни лица на возраст од 40 и повеќе години. Истражувачите анализирале кога испитаниците во текот на 24 часа го внесувале првиот и последниот оброк.
Резултатите покажале јасен образец: колку подоцна јаделе појадок, толку бил поголем ризикот од рана смрт. Во споредба со лицата кои појадувале меѓу 7 и 8 часот, 10 отсто поголем ризик бил забележан кај оние кои го јаделе првиот оброк меѓу 8 и 10 часот, додека кај испитаниците кои јаделе меѓу 10 и 12 часот тој ризик бил поголем за 19 отсто.
Најизразена разлика била забележана кај лицата кои првиот оброк го јаделе попладне. Кај нив ризикот од прерана смрт бил поголем за 29 отсто, а ризикот од смрт како последица на кардиоваскуларен настан, како што се срцев или мозочен удар, бил поголем за 46 отсто. Кај испитаниците постари од 50 години, подоцнежното јадење било поврзано и со пократкиот очекуван животен век, во просек за речиси 2,5 години.
Авторите, сепак, наведуваат дека резултатите покажуваат поврзаност, а не директна причинско-последична врска. Авторот на истражувањето, Жилеј Шан, за „ScienceAlert“ изјавил:
„Подоцнежното јадење треба да се толкува како потенцијален показател за ризик и можно променливо однесување, а не како конечен доказ за директен причинско-последичен ефект“.
Истражувачите предупредиле и на ограничувањата, бидејќи набљудувале само еден 24-часовен период, а на резултатите можеле да влијаат и навиките на спиење, времето на физичка активност и други фактори. Претходни истражувања го поврзале подоцнежното појадување и со депресија, замор, проблеми со оралното здравје, како и со нарушување на биолошкиот часовник и нагли зголемувања на нивото на шеќер во крвта.
