Почетната цена на Ајфон 18 Про изнесува 1.199 долари, а на Про Макс 1.299 долари, што е за 100 долари повеќе од минатата година.

„Има ли нешто поради што вреди да се премине од Ајфон 15 Про?“

Набргу по претставувањето, социјалните мрежи беа преплавени со првите реакции. Дел од корисниците веднаш почнаа да дискутираат дали новите модели носат доволно голем напредок за да го оправдаат купувањето.

„Тукушто се вклучив. Претставија ли нешто поради што би вредело да преминам од Ајфон 15 Про на 18 или 18 Про?“, праша еден корисник на Редит. Одговорот на друг корисник беше многу краток: „Не.“

Слично размислува и друг корисник, кој по претставувањето заклучил дека неговиот Ајфон 15 Про Макс „ќе издржи уште неколку години“.

Имаше и поотворени критики на сметка на бројот на новитети. „Дали Епл го направи Ајфон Дуо само за да ни го одвлече вниманието од фактот дека буквално нема други иновации?“, напиша еден корисник.

Друг, пак, стратегијата на Епл ја сумираше вака: „Уредите на Епл накратко: го зголемивме траењето на батеријата на производот Икс, но додадовме А, Б и Ц, кои трошат уште повеќе батерија“.

Батеријата сепак доби многу пофалби

Не беа сите коментари негативни. Дел од корисниците сметаат дека токму батеријата е една од најважните промени кај новата генерација.

„Огромен скок во траењето на батеријата дури и кај помалиот Про модел. Најголемото зголемување на траењето на батеријата досега кај Ајфон“, напиша еден корисник на Редит.

Друг корисник генерално ја пофали новата генерација и накратко заклучи: „Ова се прилично добри подобрувања“.

Интерес кај корисниците предизвикаа и цените. Додека презентацијата сè уште траеше, некои на Редит се распрашуваа колку ќе чини Про Макс, додека други се обидуваа да дознаат колкава ќе биде вредноста при замена на постарите Ајфон модели.

„Ајфон 18 излегува, а јас сè уште сум со мојот 13“

Реакциите со голема брзина се редеа и на Икс. Некои се шегуваа на сметка на тоа колку долго ги користат своите стари уреди.

„Ајфон 18 излегува, а јас сè уште сум со мојот Ајфон 13“, напиша еден корисник.

Друга корисничка се осврна на новата боја и напиша: „Оваа нова боја на Ајфон 18 ќе биде мојот телефон во 2028 година“, давајќи до знаење дека ѝ се допаѓа, но дека не планира веднаш да купи нов уред.

Еден корисник го коментираше и односот меѓу новиот Ајфон Дуо и Про моделите. „Да, бидејќи Ајфон Дуо нема да може да го замени твојот 18 Про. Затоа сакаат да ги користиш двата“, напиша тој.

Цената повторно предизвика реакции

Очекувано, меѓу главните теми на Икс беше и цената. Почетната цена на Ајфон 18 Про изнесува 1.199 долари, а на Про Макс 1.299 долари, што веднаш предизвика коментари од корисниците надвор од САД.

„Новата серија Ајфон 18 ќе пристигне во Јужна Африка, а ние ќе платиме повеќе од двојно во споредба со цената во САД“, се пожали еден корисник.

Други, пак, само ги споделуваа новите цени со неверување и ги споредуваа со постарите модели, додека на социјалните мрежи речиси веднаш почнаа да се појавуваат дискусии за тоа дали вреди да се премине од Ајфон 17 Про Макс на новата генерација.

Сепак, реакциите не беа исклучиво негативни. Покрај батеријата, дел од корисниците ја пофалија новата боја, додека други ги поздравија подобрувањата на камерата и новиот чип А20 Про.

Сепак, се чини дека најголемата дебата засега се води околу едно едноставно прашање – дали Ајфон 18 Про носи доволно новитети за да ја оправда повисоката цена и замената на уред стар две или три години.