Претседателката на Меѓународниот комитет за Аушвиц, Ева Умлауф, која го преживеала нацистичкиот логор на смртта, побара во отворено писмо забрана на крајнодесничарската партија Алтернатива за Германија (АфД) поради нивните противуставни ставови и загрижувачките политики кон бегалци и лица со попреченост.
Претседателката на Меѓународниот комитет за Аушвиц повика да се покрене постапка за забрана на крајнодесничарската партија Алтернатива за Германија (АфД) „пред да биде предоцна“.
Ева Умлауф, која го преживеала нацистичкиот логор на смртта, го упати барањето во отворено писмо до Хендрик Вист, конзервативниот премиер на најнаселената германска сојузна покраина, кој повторно ги актуализираше повиците за покренување постапка против АфД поради нејзините противуставни ставови.
„Во мај за првпат бевте во Аушвиц, токму на местото каде што јас како девојче за малку ќе бев убиена“, напиша Умлауф во писмото. Таа потсети на зборовите на Вист изговорени на тоа место: „Сеќавањето без последици останува само гест“.
Умлауф го повика премиерот на Северна Рајна-Вестфалија своите зборови да ги преточи во дела.
„Покренете постапка за забрана на АфД. Сега, пред да биде предоцна“, напиша еврејската лидерка.
По убедливата победа на АфД во источната сојузна покраина Саксонија-Анхалт, Вист повика да се формира работна група составена од претставници на сојузните и покраинските власти, која би испитала дали Сојузниот уставен суд треба да ја забрани крајнодесничарската партија.
Умлауф јасно нагласи дека не тврди оти историјата се повторува.
„Но, она што се случува денес во мене ги буди најлошите спомени“, рече таа.
Како причини за својата загриженост, таа ги наведе плановите на АфД во Саксонија-Анхалт децата бегалци да се образуваат во одделни паралелки, како и децата со попреченост да бидат издвоени од редовната настава.
Осумдесет и тригодишната Умлауф, исто така, ги опиша партиските планови за „ремиграција“ како противуставни. Овој термин во крајнодесничарските кругови често се користи за масовни депортации.
