Директорката на Меѓународниот монетарен фонд, Кристалина Георгиева, предупредува дека развиените земји како САД и Велика Британија мора да го намалат својот јавен долг поради растечките трошоци за задолжување, а особено ја потенцира потребата за политичка храброст во справувањето со глобалните економски предизвици.
Развиените економии, вклучувајќи ги Соединетите Американски Држави и Велика Британија, треба да го намалат задолжувањето и нивото на јавен долг поради зголемените трошоци за сервисирање на долгот, предупреди директорката на Меѓународниот монетарен фонд, Кристалина Георгиева.
Во интервју за Би-Би-Си, на маргините на Генералното собрание на Обединетите нации во Њујорк, Георгиева изјави дека глобалните економски шокови го зголемија нивото на долг, додека владите досега не презедоа доволно мерки за да ги ограничат трошоците за негово сервисирање.
„Време е да се преземе акција“, рече Георгиева, нагласувајќи дека за тоа е потребна политичка храброст.
„Ова се политички тешки чекори, но неопходни“, рече директорката на ММФ.
Јавниот долг на Соединетите Американски Држави надмина 40 трилиони долари и се дуплираше за приближно десет години. Зголемените трошоци за задолжување ставаат дополнителен товар врз јавните финансии на САД.
Георгиева оцени дека ситуацијата во Велика Британија не е значително различна од ситуацијата во другите големи развиени економии. Според најновите податоци, задолжувањето на британската влада во август изнесувало 18,3 милијарди фунти, додека трошоците за камата на долгот биле највисоки за август откако започнало месечното следење во 1997 година.
Зборувајќи за можното влијание на вештачката интелигенција врз финансиската стабилност, Георгиева предупреди дека поголем број случаи во кои системите за вештачка интелигенција дејствуваат непредвидливо би можеле да претставуваат значителен ризик за глобалниот финансиски систем.
Таа изјави дека светската економија во моментов е обликувана од две спротивставени сили – енергетскиот шок предизвикан од прекини во снабдувањето и силниот бран инвестиции во развојот на вештачката интелигенција.
Според неа, трајното нормализирање на снабдувањето со енергија од земјите од Персискиот Залив би бил важен чекор кон стабилизирање на глобалната економија, но, како што изјави, тоа сè уште не се случило.
