Мет Дејмон и Џејк Џиленхол ја одбиле улогата во култниот филм на Џејмс Камерон „Avatar“. Режисерот за „LA Times“ открил дека им ја понудил улогата на овие актери за да ги исполни желбите на челниците на студиото „Fox“, кои сакале звучно име во актерската екипа.

Кога тие рекле не, Камерон веднаш стапил во контакт со Австралиецот Сем Вортингтон, кој бил негов прв избор за улогата на Џејк Сали.

„Мислам дека тие никогаш немале проблем со компјутерската графика. Искрено, дали навистина давав сè од себе за да ги привлечам? Не. Срцето ми го избра Сем. Можеби почувствувале дека не сум бил 100 отсто посветен на тоа. Можеби причината беше во самата тематика. Ова беше голем филм во стилот на „Star Wars“. И двајцата се сериозни актери“, раскажал Камерон.

Актерот Сем Вортингтон во моментот кога ја добил понудата живеел во автомобил. Првиот дел од филмот „Avatar“ (2009) заработи 2,924 милијарди долари ширум светот, со што официјално го држи местото на најпрофитабилен филм на сите времиња во историјата на кинематографијата.

Вториот дел „Avatar: The Way of Water“ (2022) оствари заработка од 2,320 милијарди долари, а следното продолжение „Avatar: Fire and Ash“ (2025) донесе 1,231 милијарда долари.

Вкупно, франшизата на режисерот Џејмс Камерон досега инкасирала повеќе од 6,4 милијарди долари на светските кино-благајни.

Сем Вортингтон за улогата во првиот дел добил „скромен“ хонорар од четири милиони долари, додека ангажманот во продолжението му донел почетна заработка од 10 милиони долари плус пет отсто од профитот на филмот.

Богатството на овој актер се проценува на 60 милиони долари. Интересно е што пред улогата на Џејк Сали морал да продаде сè што поседувал за 2.000 долари за да преживее, а потоа спиел во автомобил. Денес не само што не е бездомник, туку поседува луксузни недвижности во САД и Австралија, а неговото богатство постојано расте со секое ново продолжение на филмот.

По успехот со улогата во франшизата „Avatar“, глумеше во холивудските блокбастери „Clash of the Titans“, „Terminator Salvation“, „Man on a Ledge“.

Сем од 2014 година е во брак со познатата австралиска манекенка и телевизиска личност Лара Бингл, со која има тројца синови: Рокет Зот, Рејсер и Ривер.

Поради построгите закони за папараците, актерот со семејството во 2022 година се преселил од Лос Анџелес во Њујорк. А неодамна низ смеа признал дека неговите деца воопшто не ги гледаат филмовите во кои тој глумел, ниту ги интересира тоа што татко им е холивудска ѕвезда.

Пред „Avatar“, Сем Вортингтон се занимавал со глума во родната Австралија, за што сведочат неговите улоги во „Somersault“ и „Love My Way“. Малку недостигало да стане светска ѕвезда и пред култниот филм. Во 2005 година влегол во најтесниот круг и снимал пробни сцени за улогата на Џејмс Бонд во филмот „Casino Royale“, но улогата на крајот му припаднала на Даниел Крег.

„Ми се допаѓаш токму затоа што си таков никаквец“

Сем е единствениот актер кој на аудицијата го опцул Камерон... па ја добил улогата. А кога му бил понуден ангажманот, не му било кажано ниту името на филмот, ниту името на режисерот, ниту бројни други детали.

За време на пробното снимање во Австралија му било објаснето да одглуми сцена во која скока и вика, но без каков било контекст. Побеснел и почнал да пцуе и буквално ѝ рекол на екипата што снимала: „Ова е чисто губење на моето време! Немате поим што правите, ниту мене ми кажувате што да правам!“.

Кога режисерот ја видел снимката, му било јасно дека го пронашол идеалниот актер за ликот на Џејк Сали. Му се јавил на Сем, а тој му возвратил: „Слушај, човеку, јас живеам во автомобил. Немам ништо. Нема да ги трошам малкуте пари што ги имам на авионски билет за Америка за ти таму да ме вртиш во круг ако не ти се допаѓам!“.

Култниот режисер му одговорил: „Ми се допаѓаш токму затоа што си таков никаквец. Спакувај се и доаѓај, јас ти го плаќам билетот“.

Станал бездомник по сопствена волја

Иако имал успешна кариера во Австралија и ја освоил тамошната награда „Оскар“, Сем бил длабоко незадоволен од себе. Истакнувал дека се променил како личност и дека тоа не му се допаѓало.

Одлучил дека му е потребен целосен ресет. Распродал сè што поседувал – куќата, мебелот, книгите, гардеробата. На крајот имал 2.000 долари во џебот и неколку парчиња облека. Купил половен караван, ставил душек внатре и одлучил да живее во автомобилот, на пат. Му била привлечна идејата да не зависи од никого, да нема сметки за струја и комуналии и да може да се разбуди каде што ќе посака. И така живеел со месеци, возејќи низ Австралија.

На аудицијата за улогата на Џејк Сали отишол со став дека „нема што да изгуби“, што на Џејмс Камерон му овозможило одличен увид во бунтовната, сурова и автентична енергија каква што ја барал за овој лик.

„Оди и заработи си го лебот, па врати се кога ќе пораснеш“

Животот му бил турбулентен и пред актерската кариера. Сем Вортингтон го напуштил училиштето на 17 години и работел како градежен работник и ѕидар за да преживее.

Неговиот татко му дал 400 долари и билет во еден правец за Кернс, град во североисточна Австралија, и му рекол: „Оди и заработи си го лебот, па врати се кога ќе пораснеш“. Сем набрзо почнал да работи на градилишта, мешал малтер и ѕидал.

Кога имал 19 години, неговата тогашна девојка одлучила да се запише на престижната австралиска актерска академија „NIDA“. Сем отишол со неа како поддршка. А потоа, од забава и солидарност, решил и тој да се пријави на аудиција. На крајот бил примен во ова училиште, а неговата девојка не го положила приемниот испит.

Следело неговото преселување во Сиднеј, каде што дополнително му се посветил на актерството, иако претходно немал изгледано ниту една театарска претстава.