Хојлунд му го посвети голот на Роналдо и го оттурна Жезус: Кристијано е мој идол, нема да биде заборавен

Целиот свет зборува за Кристијано Роналдо, аферата во португалската репрезентација е главна фудбалска вест и се чини дека така ќе биде уште некое време.

Така беше и синоќа во Копенхаген, каде што Португалија во третото коло од Лигата на нации ја совлада Данска со 4:2, а натпреварот го одбележа и фудбалерот на домашната селекција, Расмус Хојлунд, кој постигна гол и го прослави во стилот на Роналдо.

Данскиот напаѓач во 53. минута ја затресе мрежата на противникот и во тој момент го израмни резултатот на 2:2. Следуваше прослава, карактеристичен скок во стилот на Роналдо, ширење на рацете и неизбежното „Сиииууу“.

Хојлунд по натпреварот мораше да објасни зошто на тој начин го прославил погодокот.

„Само сакав да му го посветам голот на мојот идол Кристијано Роналдо за сè што направи. Се надевам дека знае дека неговото наследство е поголемо од секоја тешка ситуација низ која моментално минува. Кристијано изгради име кое никогаш нема да биде заборавено во историјата на овој спорт и секогаш ќе се сеќаваме на него. Има многу играчи кои пораснаа инспирирани од сето она што го направи Роналдо. Толку многу му даде на овој спорт што кон него чувствувам само огромна почит и ништо друго“, изјави Хојлунд по натпреварот.

Хојлунд е свесен дека Роналдо веројатно го одигра последниот натпревар за националниот тим.

„Кога ќе ја завршам кариерата, ќе погледнам наназад и ќе сфатам колку сум бил среќен што пораснав во истата ера со мојот идол. Ова беше само мала посвета за човекот кој веројатно ја заврши репрезентативната кариера“, изјави данскиот напаѓач.

А по натпреварот Хојлунд повторно беше во центарот на вниманието, бидејќи благо го оттурна португалскиот селектор Жорж Жезус, кој сакаше да го поздрави. Хојлунд не го објасни тој гест.