„BMW“ неодамна ја претстави новата генерација на Серија 3 со ознаката „G50“, а сега ја подготвува и нејзината попрактична „Touring“ верзија.

Иако караванот сè уште не е официјално претставен, новите неофицијални илустрации на независни дизајнери покажуваат како би можел да изгледа во спортската варијанта „M350 xDrive“.

Предниот дел и делот од каросеријата до B-столбот би требало да бидат речиси идентични со лимузината, додека „Touring“ добива продолжен покрив, поинакви странични површини и голема петта врата која овозможува пристап до поголем багажник.

Спортската верзија „M350“ има четири издувни цевки, црни детали, кровен спојлер и кровни носачи.

„M350 xDrive“ користи 3,0-литарски шестцилиндричен турбомотор со благ хибриден систем и 443 КС.

Лимузината забрзува до 100 km/h за 4,1 секунди, додека поради нешто поголемата маса, караванот би можел да забрзува за околу 4,2 секунди.

За разлика од претходните генерации, дизел-мотор не се очекува во понудата на Серија 3 „Touring“, бидејќи „BMW“ ги укина дизел-моторите во оваа линија.

Пристигнува и електричниот „i3 Touring“

„BMW“ паралелно го развива и целосно електричниот „i3 Touring“, кој ќе се продава заедно со Серија 3 со мотори со внатрешно согорување.

Камуфлирани прототипи веќе се забележани на Нирбургринг.

Електричниот „i3 50 xDrive“ користи два електромотори со вкупно 469 КС, додека батеријата со капацитет од 108,7 kWh ѝ овозможува на лимузината досег до 912 km според стандардот „WLTP“.

Сличен досег би можел да биде достапен и во караванската верзија.

Електричниот „i3“ се произведува во Минхен, додека класичната Серија 3 се произведува во Динголфинг.

Се очекува истите фабрики да бидат задолжени и за производство на соодветните „Touring“ верзии.

Засега не е познато дали „BMW“ новата Серија 3 „Touring“ ќе им ја понуди и на купувачите во Северна Америка, каде што понудата на каравани од овој сегмент традиционално е ограничена.