Криминалците што од златарница на улицата Оскар Фреире, една од најскапите локации во Сао Пауло, украле накит вреден околу пет милиони бразилски реали (800.000 евра), за време на грабежот дури пиеле и пенливо вино.
Грабежот траел околу 18 часа, меѓу неделата (11 октомври) и понеделникот (12 октомври).
Информацијата во вторникот (13 октомври) ја објавила емисијата „Bom Dia Brasil“ на телевизијата „Globo“. Според сведочењето на еден од сопствениците на ограбените продавници, криминалците испиле шише пенливо вино што го нашле во магацинот на еден од објектите.
Според наводите на цивилната полиција, во грабежот учествувале најмалку тројца криминалци. На местото пристигнале околу седум часот наутро во неделата, а објектот го напуштиле дури во 1:30 часот по полноќ во понеделникот.
Criminosos furtam R$ 5 milhões em joias de loja na Oscar Freire, em São Paulo, após abrir buracos em imóveis vizinhos https://t.co/zXiSq9dJsu #g1 https://t.co/GhuvuvdZgh
— g1 (@g1) October 13, 2026
Групата најпрво влегла во деловен простор на улицата Мело Алвеш, во населбата Жардинс, во западниот дел на Сао Пауло, каде што се изведувале градежни работи. Оттаму пробивале отвори во ѕидовите и поминале низ две продавници за облека, сè додека не стигнале до златарницата на улицата Оскар Фреире.
За време на провалата, осомничените украле и стока од продавниците за облека. За да ја отежнат идентификацијата, ги покриле безбедносните камери со алуминиумска фолија, а алармните системи ги онеспособиле.
Во златарницата го пронашле накитот во мебелот и фиоките, а не во сефови. Украле парчиња накит проценети на околу пет милиони бразилски реали, по што избегале по истиот пат по кој влегле.
Според полициските наводи, соседите не се посомневале дека се случува нешто необично бидејќи биле навикнати на бучавата од градежните работи во објектот што криминалците го искористиле за провалата.
Кражбата била откриена дури кога менаџерот на златарницата пристигнал во продавницата и ги затекнал просториите испревртени. Веднаш ја известил полицијата, која потоа ги пронашла отворите во ѕидовите и ја утврдила патеката по која осомничените се движеле низ објектите.
Безбедносните камери го снимиле движењето на криминалците пред продавниците.
Случајот е заведен како тешка кражба во 78. полициска станица во населбата Жардинс. Истрагата опфаќа форензички преглед на местото на настанот, како и користење автоматизиран систем за идентификација на отпечатоци од прсти („AFIS“).
Според информациите објавени во вторникот наутро, на 13 октомври, ниту еден осомничен сè уште не бил идентификуван ниту уапсен.
