Милијарди во средства, офшор-компании и документи со ретроактивни датуми се во фокусот на проверките во Кипар по новинарското истражување за бизнисите поврзани со рускиот милијардер Роман Абрамович.

Како што објави кипарскиот истражувачки центар CIReN, полициски претставник пред парламентарната Комисија за институции потврдил дека веќе се собираат докази. На седницата од 21 октомври било најавено дека материјалите ќе се анализираат и ќе се разговара со надлежните институции. Проверките се очекува да траат неколку месеци.

Што откриле новинарите?

Според истражувањето на OCCRP, CIReN, BBC и TBIJ, кипарската филијала на ревизорската компанија „Дилојт“ и давателот на корпоративни услуги „МеритСервус“ подготвувале документи со датуми од минатото за компании чиј краен сопственик бил Абрамович.

Новинарите наведуваат дека со тоа се создавала документација според која средства биле префрлени од Кипар кон Британските Девствени Острови години порано. Истражувањето ја поврзува оваа практика со обиди да се избегнат построги даночни обврски и правила за јавно прикажување на имотот. Овие наоди се предмет на проверки, а не правосилно утврдена вина.

Адвокатите ги отфрлаат обвинувањата

Во одговорот објавен од OCCRP на 23 октомври, адвокатите на Абрамович наведуваат дека тој не е означен како предмет на истрага и не е обвинет за неправилности. Неговиот став, според нив, е дека не затајувал данок и не го прикривал својот имот.

Авторите на првичното истражување од 12 октомври нагласуваат дека нема докази дека Абрамович знаел или го одобрил подготвувањето на спорната документација. Неговите застапници велат дека компаниите се потпирале на професионални советници за законито работење.

„Дилојт Кипар“ претходно соопштила дека работи во согласност со важечките закони. Според CIReN, надзорните тела посочиле и тешкотии при прибирањето стари податоци поради изминатото време.

На парламентарната расправа присуствувале претставници од полицијата, обвинителството, даночните власти и регулаторите. Нивната задача е да утврдат дали постојат основи за понатамошна постапка.

Кавер: архивска фотографија на Роман Абрамович од август 2014 година. Фото: Brian Minkoff-London Pixels / Wikimedia Commons, CC BY-SA 4.0. Кадрирана и намалена за Точка.