Антоан де Маси, роднина на кнезот Алберт Втори, бил пронајден мртов во парк во неделата. Властите приведоа маж во рамки на истрагата, но причината за смртта сè уште се утврдува и не е исклучен несреќен случај.
Антоан де Маси, 29-годишен член на кнежевското семејство во Монако, бил пронајден мртов во парк во неделата, 25 октомври. Властите соопштиле во понеделникот вечерта дека привеле еден маж и отвориле истрага, пренесува Ројтерс.
Причината за смртта сè уште не е утврдена. Обвинителството нагласи дека се разгледуваат сите можности, вклучително и несреќен случај.
Кнезот Алберт Втори и принцезата Шарлин. Архивска фотографија. Извор: Кнежевската палата на Монако
Според информациите што ги пренесува АФП, семејството ја известило полицијата откако во неделата напладне се загрижило затоа што не можеле да стапат во контакт со него. Телото подоцна било пронајдено во парк во близина на крајбрежниот кварт Ларвото.
Обвинителот Стефан Тибо изјавил за АФП дека истрагата е проширена за да се испита лице кое се појавува на видеоснимки во друштво на Де Маси. Тој нагласил дека улогата на приведениот и правната квалификација на настанот допрва треба да се утврдат. Приведувањето не претставува потврда дека е извршено убиство.
Де Маси бил внук на принцезата Антоанета, постарата сестра на кнезот Рение Трети, таткото на актуелниот владетел Алберт Втори.
Кнежевската палата соопшти дека Алберт Втори и принцезата Шарлин со тага ја примиле веста и изразиле сочувство до семејството и блиските. Во соопштението била истакната и неговата љубов кон тенисот, спорт со кој неговото семејство има долгогодишна поврзаност.
Извори: Ројтерс, АФП / Watson, Town & Country
