Алесандра Амбросио годинава ја „запали“ ревијата на брендот „Victoria’s Secret“. Нејзината витка фигура дојде до израз во атрактивните модни парчиња, а заводливите движења беа нејзиниот најголем украс на пистата.

Луди Делфино, личната тренерка на славната Амбросио, се огласи за „Daily Mail“ и откри како манекенката се подготвувала за овој голем настан. Истакна дека Алесандра ослабела три килограми за ревијата и дека тренирала шестпати неделно, а понекогаш и седум.

План за тренинг

Нејзиниот план подразбирал комбинација од тренинзи за сила, вежби со еластични ленти, пилатес и јога. Фокусот бил на градењето на мускулите на задникот и на рамената, а Луди осмислила и таканаречени суперсерии – изведување различни вежби една по друга, речиси без пауза.

„Често ги менував вежбите, но најмногу работевме на задникот. Покрај тоа, многу ги вежбавме нозете, стомачните мускули и грбот“, раскажала Делфино. Открила и дека Амбросио не е голема љубителка на вежбите за горниот дел од телото, но сепак му посветиле посебно внимание на грбот. „Грбот е многу важен за правилното држење, особено кога на ревијата мора да носите големи и тешки крилја“, објаснила таа.

Исфрлила одредени намирници

За да ја постигне посакуваната фигура, Амбросио морала и да исфрли одредени намирници од исхраната, односно шеќер и алкохол. Го зголемила внесот на протеини, а го намалила внесот на јаглехидрати, особено во вечерните часови.

„Жените што со години учествуваат на ревиите на брендот „Victoria’s Secret“ изгледаат подобро од кога било. Важно е да се биде упорен. Ако правилно се храните и редовно вежбате, можете да останете во добра форма. Се разбира, на некои жени им е потешко поради хормоните и други фактори“, рекла таа.