Нова закана со бомба беше пријавена во петокот наутро на лет на „Ryanair“ што од Рим пристигна во португалската престолнина Лисабон, известува „Euronews“.

Според „CNN Portugal“, португалската Полиција за јавна безбедност (ПСП) примила телефонски повик од лице што се претставило како службеник на орган за спроведување на законот и предупредило дека во авионот можеби има експлозивна направа. Идентитетот на лицето што се јавило, наводно, го проверила португалската правосудна полиција (ПЈ).

Авионот слетал на лисабонскиот аеродром Умберто Делгадо нешто пред осум часот наутро по локално време. Надлежните служби ја истражуваат заканата, но засега нема потврда дека во авионот е пронајден експлозив.

Драма на лет на „Wizz Air“: Поради дојава за бомба, авионот пренасочен кон Венеција

Авионот на „Wizz Air“, кој во петокот летал од Прага кон Рим, бил пренасочен кон Венеција поради дојава за бомба, потврди за „Reuters“ извор од аеродромот. Авионот безбедно слетал во Венеција, а околностите околу дојавата засега не се разјаснети.

Италијанската новинска агенција „ANSA“ претходно извести дека предупредувањето за бомба било упатено преку телефонски повик до контролната кула на римскиот аеродром Фјумичино. Меѓутоа, извор од аеродромот ја оспори таа информација, наведувајќи дека дојавата не била примена на начинот што го опиша „ANSA“.

Полицијата ги истражува заканите во Копенхаген, аеродромот е под надзор

Данската полиција повторно интервенираше на аеродромот во Копенхаген поради закани упатени кон воздушниот сообраќај, извести „Reuters“.

„И денес повторно сме на аеродромот во Копенхаген поради закани насочени кон воздушниот сообраќај. Во моментов го истражуваме инцидентот, а нашето присуство на аеродромот е видливо“, соопшти полицијата во Копенхаген.

Полицијата истакна дека, според првичната процена, немало непосредна опасност за патниците. Детали за природата на заканите засега не се објавени.

Управата на аеродромот го потврди присуството на полициските сили, но нагласи дека сообраќајот се одвива нормално.

Новите закани доаѓаат само еден ден откако специјализирана воена единица за отстранување експлозивни направи прегледала два авиона на најголемиот дански аеродром. Проверките биле извршени поради дојави за можни бомби, но експлозивни направи не биле пронајдени.

Ден претходно беа погодени најмалку 25 лета

Најновата тревога следува откако во четвртокот низ Европа беа пријавени низа дојави за бомби, поради кои дел од авионите мораа да ја сменат рутата, а во некои случаи беа ангажирани и воени авиони. Според најновите податоци што ги пренесува „Euronews“, безбедносните закани погодиле најмалку 25 лета низ Европа.

Еден од посериозните инциденти беше регистриран на лет на „Aer Lingus“ од Даблин кон Рим. Поради дојава за бомба, авионот беше пренасочен кон француската воена база Евре, каде што безбедно слета во придружба на воени авиони.

Дојави беа регистрирани и на летови кон Прага, Софија, Виена и други европски одредишта. Досегашните проверки покажаа дека заканите од четвртокот биле лажни.

Дали инцидентите се поврзани?

Големиот број дојави што речиси истовремено ги погодија европските аеродроми го отвори прашањето дали заканите се дел од координирана акција. Претставници на Европската Унија предупредуваат дека сè уште е прерано да се заклучи дали инцидентите се поврзани.

Во меѓувреме, португалските власти продолжуваат да ја проверуваат најновата дојава. „Euronews“ наведува дека лисабонскиот аеродром не сакал да го коментира случајот и ги упатил новинарите до Полицијата за јавна безбедност, која во моментот на објавувањето официјално не го потврдила пријавениот инцидент.