Мислите дека чашка алкохол ќе ве загрее? Експерт откри што навистина се случува во телото

„Постои чувство на топлина, но во реалноста не доаѓа до загревање“, истакнал Винстон Морган, професор по токсикологија, еднаквост и инклузивни практики на Универзитетот Источен Лондон, за „Гардијан“.

Алкохолот влијае врз системот со кој телото ја регулира температурата. Нашата внатрешна телесна температура ја контролира хипоталамусот, дел од мозокот кој помага во регулирањето на реакциите на организмот на температурните промени.

Кога нѝ е премногу топло, крвните садови во близина на површината на кожата се шират, што е процес познат како вазодилатација. На тој начин се овозможува поголема количина топла крв да циркулира во близина на површината на кожата, каде што топлината може да се ослободи во околниот воздух.

Кога нѝ е премногу студено, се случува спротивното. Крвните садови се стеснуваат, со што се намалува протокот на крв кон кожата и се помага во задржувањето на топлината.

Алкохолот го нарушува овој процес. Тој предизвикува ширење на крвните садови во близина на површината на кожата, дури и кога внатрешната телесна температура не е зголемена. Поголема количина топла крв стигнува до површината на кожата, поради што можеме да почувствуваме топлина, па дури и да посакаме да соблечеме дел од облеката.

„Насочувате повеќе крв кон кожата, што ви создава чувство дека ви е потопло“, објаснил Морган. „Но, всушност не е така. Вашето тело само ја прераспределува крвта“, додал тој.

Покрај тоа, со зголемувањето на протокот на крв кон кожата, алкохолот го поттикнува губењето на телесната топлина, што може да доведе до намалување на внатрешната телесна температура. Во доволно студени услови, тоа може да го зголеми ризикот од хипотермија, особено ако почнете да ја соблекувате облеката.

„По одредено време, всушност се случува внатрешната температура на вашето тело да почне да опаѓа“, рекол Морган. „Затоа, во студена средина навистина не се препорачува консумирање големи количини алкохол“, заклучил професорот.