Унгарските истражни служби заплениле повеќе од шест милијарди форинти, како и милиони евра и долари, во голема акција поврзана со истрага против поранешен министер од владата на Виктор Орбан. Дел од парите биле закопани во шуми, а други биле сокриени во земјоделски објекти, магацини, станбени имоти и сефови на тајни локации.

Според соопштението на Националната канцеларија за враќање и заштита на имотот, во акциите спроведени на 12 и 13 ноември биле пронајдени вкупно 5.071.632.000 форинти, 2.658.350 евра и 1.257.100 американски долари.

Претресите биле извршени на повеќе локации низ земјата, меѓу кои Будимпешта и областите Пешта, Бекеш и Ноград.

Најголем дел од готовината бил откриен на необични места – закопан во шуми или сокриен во земјоделски и магацински објекти. Пари биле пронајдени и во станбен објект, како и во скап сеф на тајна локација.

Целокупната запленета сума е предадена на унгарската државна каса. Во акцијата учествувале Националното истражно биро, специјалните полициски единици и Националната даночна и царинска управа.

Петер Маѓар: Крај на „мафијата Фидес-КДНП“

По заплената реагираше и унгарскиот премиер Петер Маѓар, кој оцени дека случајот го означува крајот на, како што ја нарече, „мафијата Фидес-КДНП“.

Неговата изјава се однесува на партијата Фидес на поранешниот премиер Виктор Орбан и Христијанско-демократската народна партија (КДНП), кои со години ја сочинуваа владејачката коалиција во Унгарија.

Here is the footage released by the National Asset Recovery and Protection Office showing billions of forints’ worth of cash being dug out of the ground. The money belonged to @PM_ViktorOrban’s former minister, Miklós Seszták.

When the money was handed over, 12 employees of the Hungarian State Treasury spent eight hours counting it using five cash-counting machines.

From today, Viktor Orbán is proven to be a mafia boss. An ousted mafia boss. And Fidesz is a criminal organisation.

— Magyar Péter (Ne féljetek) (@magyarpeterMP) November 13, 2026

Маѓар ја поврза заплената со истрагата против поранешниот министер од владата на Орбан, со што случајот доби и политичка димензија.

Поранешниот министер осомничен за примање мито од 11 милијарди форинти

Истрагата е насочена кон Миклош Шештак, кој беше министер за национален развој од 2014 до 2018 година, во времето на владеењето на Орбан. Тој е член на КДНП и пратеник во унгарскиот парламент.

Против него се води постапка под сомнение за примање мито и други кривични дела поврзани со државни работи и јавни набавки.

Според сомневањата на обвинителството, Шештак и Норберт Сивек, тогашен директор на унгарската државна агенција за управување со имот, во периодот од 2015 до 2018 година преку посредници примиле повеќе од 11 милијарди форинти незаконска корист од претставници на компании кои имале договори со државниот автобуски превозник „Воланбус“.

Истрагата опфаќа сомнителни договори за патнички превоз и набавка на автобуси.

Шештак беше уапсен во септември, а судот му одреди притвор, кој подоцна беше продолжен до 30 јануари 2027 година. Поранешниот министер ги негира обвинувањата и тврди дека не сторил никакво кривично дело.

Заплената на огромните количества готовина е еден од најзначајните моменти во истрагата за можни злоупотреби за време на претходната власт во Унгарија.