Според долгорочната проекција на Европската комисија, работната сила во ЕУ на возраст од 20 до 64 години би можела до 2080 година да се намали за дури 36 милиони луѓе во однос на 2025 година, што претставува пад од околу 17 отсто.

Овие промени ќе се одвиваат паралелно со вкупното намалување на бројот на жители. Проценките покажуваат дека ЕУ ќе го достигне демографскиот врв во 2029 година, со 453 милиони жители, по што ќе следува постојан пад на околу 414 милиони до 2080 година. Истовремено, уделот на граѓаните постари од 65 години ќе се зголеми од сегашните 22 на дури 33 отсто од вкупното население.

Ќе работиме подолго, но тоа нема да го промени трендот

Иако Европската комисија очекува поголема активност на пазарот на трудот, тоа само ќе го ублажи, но нема да го запре недостигот на работници. Проекциите се засноваат на претпоставката дека пензиските реформи низ Европа ќе го поместат просечното пензионирање за околу две години, што ќе донесе значителни промени во старосната структура на вработените:

• Општа стапка на активност (20–64 години): зголемување од 81 на 84 отсто.

• Постари работници (55–64 години): стапката на активност ќе достигне 78 отсто.

• Граѓани од 65 до 69 години: работната активност речиси ќе се удвои и ќе достигне 38 отсто.

Недостигот на работници како кочница за економскиот раст

Намалувањето на бројот на работоспособни граѓани директно ќе се одрази и врз економијата. Во резимето на анализата на Европската комисија (која ги опфаќа земјите членки на ЕУ и Норвешка) се предупредува дека работната сила „од почетокот на 2030-тите ќе стане кочница за растот“, наместо да придонесува за него.

Поради тоа, идниот економски раст на ЕУ – за кој се предвидува дека во периодот од 2026 до 2080 година ќе изнесува скромни еден отсто годишно – речиси целосно ќе зависи од продуктивноста на трудот и новите технологии, односно од поголемите инвестиции на капитал по работник.

Подетални проекции за тоа како овој демографски притисок ќе влијае врз јавните расходи за пензии, здравство, долгорочна нега и образование, Европската комисија најави за пролетта 2027 година, пренесува „Bankar.me“.